Gazetari investigativ Artan Hoxha, i ftuar në emisionin “Çim Peka LIVE” në SYRI TV, ka paralajmëruar për shtrirjen dhe fuqizimin e grupeve kriminale shqiptare, të cilat sipas tij nuk veprojnë më vetëm pranë kufijve, por kanë hyrë në qytetet kryesore të Shteteve të Bashkuara të Amerikës.
“Ne kemi struktura të mirëfillta që trafikojnë kokainë të marrë direkt nga Amerika Latine dhe e shpërndajnë brenda qyteteve të mëdha të SHBA, nga Majami, Florida, Nju Jork, Los Anxhelos e deri në Çikago. Ata janë kthyer në problem serioz për administratën e re të presidentit Trump, që kërkon t’i shkatërrojë,” – tha Hoxha.
Sipas tij, këto organizata kanë ndërtuar rrjete të qëndrueshme që nga vitet 2008–2009, ndërsa hetimet federale amerikane dhe europiane vazhdojnë. “Do i dëgjoni më vonë, janë duke i gjurmuar. Prioriteti i madh i SHBA-ve sot ka përfshirë edhe Shqipërinë,” – u shpreh ai.
Gazetari rikujtoi se dikur Prokuroria e Krimeve të Rënda zhvillonte hetime të brendshme duke infiltruar njerëz brenda organizatave, ndërsa sot SPAK mbështetet kryesisht te dosjet dhe përgjimet e ardhura nga jashtë vendit.
Hoxha solli në vëmendje edhe grupe konkrete kriminale si “Çopjat”, për të cilët ai kishte paralajmëruar që në vitin 2018, duke theksuar se vetëm në Belgjikë një degë e tyre kishte trafikuar mbi 32 ton drogë brenda pak javësh.
Ai ngriti shqetësimin për logjistikën e fuqishme që këto organizata zotërojnë sot:
“Bën një kontroll rutinë në Shkodër dhe gjen më shumë dronë se Ministria e Brendshme. Pse nuk kishin këtë fuqi para vitit 2013? Nga erdhi kjo shtrirje globale? Ne kemi grupe që hetohen nga SPAK pa qenë kapur asnjë gram drogë në Shqipëri, ndërkohë që jashtë janë kapur dhjetëra tonë.”
Hoxha përfundoi duke nënvizuar se rritja e këtyre strukturave kriminale është bërë nën qeverisjen e Edi Ramës, duke e kthyer Shqipërinë në një nyje të rëndësishme të trafikut ndërkombëtar të drogës.
