Ish-futbollisti Saimir Patushi ka ngritur akuza ndaj trajnerit të Kombëtares, Sylvinho.
Në një intervistë në Ora News, ai u shpreh se marrëdhëniet mes lojtarëve dhe brazilianit janë përkeqësuar, duke folur për një çarje serioze brenda skuadrës.
“Të them të drejtën, ne jemi zhgënjyer, sidomos pjesa e trajningut shqiptar. Shikoj një çarje mes grupit të lojtarëve dhe Sylvinhos. Një pjesë e mirë e tyre nuk i përgjigjen më trajnerit, sepse janë kapriçot e tij që çuan në këtë situatë”, tha Patushi.
Ai shtoi se Sylvinho e ka humbur kontrollin, ndonëse përpiqet të krijojë përshtypjen se çdo gjë është nën menaxhim. “Që të bësh atë 90 minutësh që Sylvinho bëri në miqësore… po të ishte ndonjë trajner shqiptar do të ishte persekutuar dhe larguar. Misteri mendon se i ka gjërat në dorë, por realisht çdo gjë i ka dalë jashtë funksionit”, theksoi ish-futbollisti.
Megjithatë, Patushi shpreson që futbollistët të marrin përgjegjësitë vetë dhe të japin maksimumin për fanellën kuqezi: “Uroj që djemtë ta marrin situatën në dorë dhe të japin më të mirën për Kombëtaren.”
