Kryeministri Edi Rama ka prezantuar paketën e re ligjore për mbrojtjen e pronës dhe territorit, duke paralajmëruar se ofensiva ndaj ndërtimeve pa leje mund të zgjasë gjatë gjithë mandatit të tij.
Në fjalën e tij, Rama u shfaq si mbrojtës i pakompromis i projekteve arkitektonike dhe blerësve, duke paralajmëruar se çdo ndërhyrje e mëparshme ishte një deformim i autorësisë dhe mashtrim ndaj qytetarëve.
“Për këtë paketë të re ligjore që do të prezantojmë është punuar me shumë intensitet nga një grup i gjerë ekspertësh, juristësh dhe me ndihmën e disa deputetëve që kanë pasur një aktivitet të lidhur me komisionin e ligjeve. Dua t’i falënderoj të gjithë ata që kanë marrë pjesë në këtë punë që është zhvilluar gradualisht gjatë gjithë periudhës së verës dhe besoj shumë që duke bërë parantezën që padiskutim nuk është asgjë e përkryer, as kjo paketë nuk është e përkryer, por është një tërësi masash që do të na japin mundësinë të kemi në dorë instrumenta të reja për të mbrojtur territorin, duke filluar nga suksesi përfundimtar i një ofensivë që po do të zgjasë aq sa të jetë e nevojshme, ndoshta gjatë gjithë mandatit të ri, për ndalimin pa kthim të çdo shfrytëzimi për të ndërtuar pa leje, duke vazhduar deri te mbrojtja e autorësisë së projekteve arkitektonike, të cilat gjatë gjithë kësaj kohe që kur në Shqipëri ka filluar të ndërtohet, janë deformuar dhe përdhunuar në formën e tyre nga ndërhyrja e ndërtuesve, gjë që sigurisht i kthen në praktikisht pothuajse formale vendimmarrjet që marrin njësitë përkatëse të qeverisjes vendore. Dhe një tjetër pasojë e konsiderueshme mashtrimi që iu bëhet blerësve duke iu shitur objekte që ka marrë leje me pamjet e lejes të paraqitura”,- tha Rama.
Por ndërsa qeveria premton goditje ndaj shkelësve, vendimet e fundit të Këshillit Kombëtar të Territorit dhe Ujit (KKTU) tregojnë një realitet krejt tjetër: hapësira të klasifikuara si ullishte apo pemëtore, edhe kur nuk kanë pemë ose prodhim, mund të përdoren për projekte ndërtimi.
LEXO EDHE:
Kur toka bujqësore bëhet beton! Rama i hap rrugë ndërtimeve në “pemëtore” dhe “ullishte” pa pemë
