Në debatin mbi Serbinë në Parlamentin Evropian, partia e presidentit Vuçiç e quajtur Progresiste ka marrë një paralajmërim nga organizata ku bëjnë pjesë partitë Popullore Evropiane. Presidenti i grupit parlamentar të këtyre partive të djathta, Manfred Weber, deklaroi se po monitorojnë protestat.
“Ne kemi mendime të ndara për këtë çështje në mesin e Partive Popullore Evropiane. Jemi në dijeni të ngjarjeve në Serbi, shohim pamjet nga atje. PPE nuk është e verbër ndaj këtyre zhvillimeve. Ne kemi nisur që të monitorojmë aktivitetin e presidentit Vuçiç, si dhe anëtarësinë e Partisë së tij Progresiste, dhe do ta diskutojmë këtë situatë në ditët në vijim.”
Partia Progresive Serbe ka qenë anëtare e asociuar e PPE-së që nga viti 2016.
E pranishme në këtë seancë, Komisionerja për Zgjerimin, Marta Kos, theksoi se njerëzit kanë të drejtë të protestojnë, ndërsa apeloi që të ndalet dhuna serioze në rrugët e Serbisë, si dhe aktet e vandalizmit.
Gjatë diskutimeve u tha se deklaratat e Presidentit Vuçiç dhe Kryetares së Parlamentit Brnabiç kundër eurodeputetëve nuk do ta përmirësojnë reputacionin e Beogradit në Bruksel. Sipas tyre, kur anëtarët e Parlamentit Evropian quhen “plehra”, kjo tregon një kuptim të dyshimtë të demokracisë.
U bë thirrje që Serbia të ndërtojë një gjyqësor të pavarur, që mund të luftojë në mënyrë efektive korrupsionin. Po ashtu, sipas eurodeputetëve, reformimi i ligjit zgjedhor garanton që vetëm vullneti i popullit serb vendos për shumicën në parlament.
