Janë zbardhur detaje të reja nga atentati që tronditi mbrëmjen e të enjtes qytetin e Shkodrës, ku u ekzekutua me armë zjarri 34-vjeçari Kristian Kola. Ngjarja ndodhi rreth orës 22:30, në një lokal tek kinema “Republika”, në lagjen “Vasil Shanto”.
Edhe pse nuk është konfirmuar ende zyrtarisht nga autoritetet, burime për mediat bëjnë me dije se motori i përdorur nga autorët për t’u larguar nga vendi i ngjarjes, është gjetur nga Policia e Shkodrës totalisht i shkrumbuar në fshatin Vakatanë.
Mësohet se mjeti është dërguar për ekzaminim në laboratorin e kriminalistikës me qëllim përftimin e ndonjë gjurme. Gjithashtu, hetuesit shpresojnë të arrijnë të sigurojnë nr. e shasisë së tij, për të zbuluar më pas mënyrën se si ai ka rënë në duart e vrasësve.
Dyshohet se dy autorët që morën pjesë në krim, të jenë ndihmuar nga persona të tjerë për t’u larguar nga fshati Vakatanë, pas djegies së motorit dhe se dyshimet janë se kemi të bëjmë me një grup vrasësish me pagesë.
Grupi hetimor po vijon me kqyrjen e filmimeve të kamerave të sigurisë, ku rezulton se dy autorët e maskuar me skafandra dhe të veshur me të zeza, humbin gjurmët me motor pranë stacionit të trenit.
Personi që ka patur rolin e ekzekutorit, dyshohet se ka qenë vrasës profesionit, i cili ka qëlluar 8 herë mbi 34-vjeçarin, me një armë zjarri me silenciator, duke e lënë të vdekur në vend, pa shkaktuar dëme të tjera.
Edhe pse Kristian Kola rezulton një person pa precedent penal, grupi hetimor ka verifikuar disa pista, si dhe ka shoqëruar dhjetëra persona, por ende pa asnjë rezultat. Policia dhe prokuroria po hetojnë për të shkuarën e tij, si dhe për ndonjë konflikt të mundshëm të kohëve të fundit.
Para afro një viti e gjysëm viktima ka patur një konflikt për motive të dobëta, por atë konflikt e ka mbyllur dhe nuk qëndron si pistë hetimi për Policinë. 34-vjeçari ka qenë dy herë për periudha të shkurta jashtë Shqipërisë, por as atje nuk raportohet për përfshirjen e tij në ndonjë konflikt të mundshëm.
Kristian Kola punonte në një kompani ndërtimi që e kishte së bashku me të atin. Burime pranë grupit hetimor bëjnë me dije se familjarët e viktimës nuk kanë qenë ndihmues në deklarimet e tyre për të zbardhur të shkuarën e 34-vjeçarit.
