Serbia ka fituar minimalisht 0-1 në transfertë kundër Letonisë në ndeshjen e vlefshme për grupin K të kualifikueseve të Botërorit, grup ku bën pjesë edhe Shqipëria.
“Heroi” i ndeshjes së sotme për serbët ishte Dushan Vlahoviç, i cili realizoi golin e vetëm të takimit që në minutën e ’12 me një goditje nga jashtë zone. Në vazhdimin e lojës, pavarësisht tentativave, asnjë ekip nuk arriti të realizojë gol.
Me këtë fitore, Serbia ngjitet në kuotën e 7 pikëve në tre ndeshje, me dy fitore dhe një barazim. Fitorja e Serbisë, i zbret kuqezinjtë e Silvinjos në vendin e tretë me pesë pikë, teksa duhet theksuar fakti se Shqipëria ka edhe një ndeshje më shumë se ekipi i Stojkoviç.
Ndeshja e radhës për Letoninë do të jetë ndaj Shqipërisë më 9 shtator, në stadiumin “Air Albania” në Tiranë. Ndërsa Serbia do të luajë në shtëpi kundër Anglisë në po të njëjtën ditë.
