Prokuroria Themelore në Prishtinë ka ngritur aktakuzë ndaj katër shtetasve të huaj, tre turq dhe një maqedonas, për lëshim të çeqeve pa mbulesë, pastrim parash dhe keqpërdorim të kartelave bankare dhe të kreditit.
Sipas Prokurorisë, të akuzuarit kanë vepruar nga 11 nëntori 2024 deri më 20 shkurt 2025, duke regjistruar biznese dhe llogari bankare në emër të tyre dhe duke keqpërdorur qindra kartela ndërkombëtare. Përmes këtyre veprimeve, ata kanë përfituar mbi 372,900 euro.
“Po ashtu, duke ditur se pasuria e fituar vinte nga aktivitet kriminal, të pandehurit kanë tërhequr kesh nga ATM-të dhe kanë bërë transferime jashtë Kosovës, përkatësisht në Turqi, me qëllim shmangien e përgjegjësisë ligjore. Ekspertiza financiare ka konstatuar se shuma e pastrimit të parave arrin 372,900.42 euro,” njofton Prokuroria.
