Autoritetet policore greke kanë zbardhur vrasjen e 47-vjeçarit nga Gjirokastra, Artur Bashimi, i cili u ekzekutua mbrëmjen e 18 Gushtit në Athinë.
Mediat fqinje raportojnë se nga hetimet ka rezultuar se autori është një 27-vjeçar grek, përdorues i lëndëve narkotike, i cili është arrestuar nga autoritetet policore. Në dëshminë e dhënë në Polici, i riu ka deklaruar se ishte paguar 15 mijë euro për ekzekutimin e 47-vjeçarit shqiptar.
Gjithsesi, ai ka pretenduar se nuk e njeh porositësin e këtij atentati dhe as arsyet pse është kryer vrasja e Artur Bashimit, teksa ka shtuar se “kontrata” i është caktuar atij nga brenda burgjeve.
Sipas hetimeve, urdhri për ekzekutimin dyshohet se është dhënë nga një kreu i një mafie shqiptare nga burgu. Autoritetet mendojnë se vrasja ishte një mesazh drejtuar vëllait të viktimës, i cili jeton në Larisa dhe dyshohet të jetë i përfshirë në rrjete kriminale të ndryshme.
Kujtojmë se Artur Bashimi u qëllua me armë në orën 21:25 të mbrëmjes së 18 gushtit në kryqëzimin e rrugëve “Michael Voda” dhe “Rodou” në lagjen “Agio Pantaleimona” të Athinës. Në atë kohë, autori, i cili po ngiste një motorçikletë, iu afrua dhe e qëlloi viktimën në gjoks, duke e lënë të vdekur në vend.
Artur Bashimi rezulton i arrestuar në shkurt 2022 si pjesë e një grupi kriminal që kryente vjedhje në mjetet e transportit publik. Ai është arrestuar sërish më pas në prill 2024, po si pjesëtar i një grupi kriminal që kryente vjedhje në Greqi.
47-vjeçari rezulton të jetë vëllai i 38-vjecarit Marsel Bashimi alias Marsel Shkurtaj alias Marsel Gozhita, person me precedentë të rëndë penalë në Greqi e Shqipëri.
Marsel Bashimi në korrik 2022 u arrestua bashkë me Bledar Jambellin dhe Kristaq Lecin, si autorë të një ngjarjeje të rëndë me përdorim armësh në Greqi. Jambelli e Leci akuzohen në Shqipëri si autorë të vrasjes së Komisar Artan Cukut.
