Trajneri i Kombëtares shqiptare, Silvinjo, doli sot para mediave në konferencën zyrtare përpara miqësores kundër Gjibraltarit, që do të shërbejë si testim para sfidës vendimtare ndaj Letonisë në Tiranë.
“E dimë që duhet të përgatitemi mirë për Letoninë, sepse janë ekip i fortë fizikisht dhe shumë i organizuar. Në ndeshjen e parë patëm vështirësi në mbrojtje si skuadër, ndaj duhet të jemi gati për gjithçka”, u shpreh tekniku brazilian.
I pyetur për Ardian Bajramin i cili ka zgjedhur të ndërrojë federatë, Silvinjo tha:
Kur flet për Bajramin është e thjeshtë. Kishim një listë pritje, që me 17 gusht, dy javë më vonë nuk kisha asnjë përgjigje ndaj isha i lirë të bëja një listë, bëhet fjalë për lojtarët që merr. Kishim miqësoren dhe Letoninë. Një ditë më vonë, pas konferencës, dikush nga federata më telefonoi dhe më tha që Bajrami ka zgjedhur të ndërrojë federatën.
Ishte të shtunën, fola me të rreth 30 minuta me telefon, gjithçka është qartësuar. Fat të mbarë, ndodh shumë shpesh në botë, edhe me eksperiencën në Brazil. 2-3 lojtarë flitnin për Brazilin apo Italinë. Asgjë më shumë se kaq, kjo është e vërtetë. Për fat të keq, por asgjë tjetër. I uroj më të mirën.
Trajneri vlerësoi edhe elementët e rinj të grumbulluar: “Jam i lumtur me lojtarë si Kaçurri, Shpendi, Çokaj. Ata po e shijojnë eksperiencën dhe japin maksimumin. Çdo lojtar që hyn në fushë nesër, do të provojë të fitojë”.
Në fund, Silvinjo theksoi se mendja e tij është vetëm tek grupi aktual: “Mendoj për 24 lojtarët që kemi. Pasnesër do të vendosim për 11-shen ndaj Letonisë. Duhet të japim më të mirën sepse brenda 6 ditëve kemi dy ndeshje të rëndësishme”.
