Hamasi ka bërë publike një deklaratë zyrtare ku shprehet i gatshëm për të arritur një marrëveshje gjithëpërfshirëse, e cila do të çonte në përfundimin e luftës në Rripin e Gazës dhe lirimin e të gjithë pengjeve izraelite.
“Jemi të gatshëm të pranojmë një marrëveshje gjithëpërfshirëse, sipas së cilës të gjithë të burgosurit armiq që mbahen aktualisht do të lirohen, në këmbim të një numri të rënë dakord të të burgosurve palestinezë të mbajtur nga Izraeli, si pjesë e një mirëkuptimi që do të çojë në fund të luftës në Rripin e Gazës”, thuhet në deklaratën e Hamasit.
Sipas kësaj marrëveshjeje, Hamasi kërkon :
- Tërheqjen e plotë të forcave izraelite nga i gjithë Rripi i Gazës;
- Hapjen e kalimeve për hyrjen e të gjitha mallrave dhe furnizimeve të nevojshme për popullsinë;
- Fillimin e menjëhershëm të procesit të rindërtimit.
Po ashtu,, lëvizja deklaroi gatishmërinë për krijimin e një qeverie të pavarur kombëtare të përbërë nga teknokratë, e cila do të marrë përgjegjësitë për menaxhimin e të gjitha çështjeve në Rripin e Gazës.
“Ne ende po presim përgjigjen e Izraelit ndaj propozimit të paraqitur nga ndërmjetësit më 18 gusht, një propozim i cili u pranua nga lëvizja dhe fraksionet palestineze”, – theksohet në deklaratë.
