Policia e Tiranës ka arrestuar një të ri me recendent të theksuar penal, i cili lëvizte i armatosur në rrugët e kryeqytetit.
Në kuadër të operacionit të koduar “Again” është vënë në pranga shtetasi Silveste Sylaj, 30 vjeç, banues në Tiranë, i dënuar më parë për armëmbajtje pa leje dhe për vjedhje me dhunë.
Autoritetet policore raportojnë se ai është kapur në rrugën “Ibrahim Rugova”, duke lëvizur me këmbë, me një armë zjarri pistoletë me fishek në fole, që e mbante në brez.
Ndërkohë, blutë e kryeqytetit kanë arrestuar edhe shtetasin Erjon Tafilaku, 35 vjeç, i cili shoqëronte 30-vjeçarin. Ai akuzohet për moskallëzim krimi.
Arma e zjarrit pistoletë është sekuestruar së bashku me municionin luftarak. Materialet procedurale janë referuar në Prokurorinë e Tiranës për veprime të mëtejshme.
