David Luiz, mbrojtësi i njohur brazilian që vijon të luajë ende në moshën 38-vjeçare me klubin Pafos në Qipro, ka kërkuar ndihmën e avokatëve pasi u akuzua se ka ngacmuar dhe kërcënuar një punonjëse sociale 26-vjeçare, duke i thënë se “mund ta zhdukte” pasi ajo refuzoi të pranonte një treshe seksuale me të.
Ish-lojtari i skuadrave si Vitória, Benfica, Chelsea, PSG, Arsenal, Flamengo dhe Fortaleza ka marrë një urdhër ndalimi nga një gjykatë braziliane për shkak të dyshimeve për kërcënim ndaj Francisca Karollainy Barbosa Cavalcante.
Sipas denoncimit të vajzës, e cila dëshmoi në polici, mesazhet e David Luiz e bënë atë të ndihej se jeta e saj dhe e djalit të saj ishin nën kërcënim të drejtpërdrejtë. Konflikti shpërtheu pas refuzimit të saj për të kryer një akt seksual tresh.
David Luiz, i fejuar me Bruna Loureiro-n, mohon se e njeh Francisca-n, por pranon se i ka dërguar mesazhe private në Instagram.
Nga ana tjetër, Francisca ka denoncuar se pas përfundimit të marrëdhënies së supozuar, ka marrë mesazhe kërcënuese nga Luiz, ku ai e paralajmëronte për “paratë dhe fuqinë” e tij, madje i shkruante se ajo nuk do të jetonte gjatë.
Shtypi brazilian raporton se Francisca disponon screenshot-e të mesazheve, ku mes të tjerash, David Luiz i kishte shkruar: “Do të paguash pasojat” dhe “thjesht mund të të zhdukesh”. /The Sun
