Janë zbardhur detaje të reja për vrasjen e 58-vjeçarit shqiptar Fatos Cenaj në qershor të këtij viti në Fontaniva, provinca e Padovës. Autoritetet italiane kanë vënë nën hetim një fqinj të tij, një 40-vjeçar italian, i cili akuzohet për vrasje të qëllimshme.
Sipas mediave italiane, shkaku i konfliktit dyshohet të ketë qenë debati për kufirin mes pronave dhe instalimin e kamerave të sigurisë, që ka përshkallëzuar marrëdhëniet mes dy fqinjëve.
I dyshuari, që punonte si punëtor në një fabrikë dhe ishte nën kujdesin e qendrës së shëndetit mendor, dyshohet se ka planifikuar me detaje krimin. Mëngjesin e 8 qershorit, ai ishte fshehur mes pemëve pranë fermës “Dindo”, ku Cenaj punonte, dhe në momentin që shqiptari kaloi, e qëlloi nga pas me armë zjarri, duke e goditur në kokë, në zonën e veshit.
Hetuesit kanë sekuestruar prova të rëndësishme, përfshirë pamje nga kamerat e sigurisë që mendohet se kanë qenë vendimtare në identifikimin e autorit. Gjithashtu, banesa e tij është kontrolluar nga karabinierët në kuadër të hetimeve.
Pavarësisht ndërhyrjes mjekësore, Cenaj humbi jetën disa ditë më vonë në spital, për shkak të plagës së rëndë.
