Partizani ka mbyllur një tjetër goditje në merkato duke siguruar shërbimet e Rrok Tomës.
Sulmuesi 21-vjeçar ka lënë përfundimisht skuadrën italiane të UC AlbinoLeffe për t’u bashkuar me të kuqtë, me të cilët ka firmosur një kontratë trevjeçare me mundësi rinovimi.
Sezonin e kaluar, Toma ishte huazuar te Teuta, ku grumbulloi eksperiencë në futbollin shqiptar. Tashmë, ai kthehet në Superiore, por këtë herë për të veshur fanellën e kuqe të “Demave”, me pritshmëri të larta për të dhënë kontribut të menjëhershëm.
Në marrëveshjen e arritur, klubi italian ka ruajtur 30% të të drejtave të kartonit, çka do t’i sjellë përfitime në rast të një transferimi të mundshëm në të ardhmen.
Ndërkohë, Toma është edhe pjesë e Kombëtares shqiptare U21 të drejtuar nga Alban Bushi dhe pritet të marrë pjesë në dy miqësoret e radhës kundër Zvicrës dhe Gjermanisë. Vetëm pas këtyre impenjimeve ai do t’i bashkohet ekipit të ri në stërvitje.
