Policia e Krujës ka goditur 2 raste të kultivimit të kanabisit.
‘Blutë’ bëjnë me dije se është arrestuar në flagrancë një 66-vjeçar, pasi është kapur duke ujitur 54 bimët narkotike që kishte kultivuar në oborrin e banesës së tij.
Po ashtu policia raporton se ka shpallur në kërkim një 62-vjeçar dhe ka proceduar banain e tij të moshuar, pasi dyshohet se kanë kultivuar dy parcela me 50 rrënjë kanabis.
“Shërbimet e Komisariatit të Policisë Krujë, si rezultat i punës kundër veprimtarisë kriminale të kultivimit të bimëve narkotike, evidentuan dhe goditën 2 raste të tjera në këtë fushë, për të cilat:
-u arrestua në flagrancë shtetasi P. Ç., 66 vjeç, pasi u kap duke ujitur 54 bimët narkotike që kishte kultivuar në oborrin e banesës së tij;
-u shpall në kërkim shtetasi Xh. Sh., 62 vjeç, si dhe u referuan materialet në Prokurori, ku nisi procedimi në gjendje të lirë për babanë e tij, shtetasin P. Sh., 82 vjeç, pasi nga një hetim i ndjekur me metoda speciale, në drejtimin e Prokurorisë së Tiranës, dyshohet se kishin kultivuar në 2 parcela, 50 bimë narkotike. Punohet për kapjen e shtetasit Xh. Sh.”, thuhet në njoftimin e policisë.
Materialet procedurale iu referuan Prokurorisë së Tiranës, për veprime të mëtejshme.
