Personi që shihni në foto është Dritan Pine, 54 vjeç, autori i plagosjes me thikë të Mihal Zhidros dhe Sotiraq Shkurtit, gjatë një sherri të ndodhur mbrëmjen e djeshme në një lokal pranë parkut të Korçës.
Pine akuzohet për një sërë veprash penale, mes tyre “Vrasja me dashje” mbetur në tentativë, “Plagosja e rëndë me dashje”, “Plagosja e lehtë me dashje”, “Shkatërrimi i pronës”, “Deklarimi i rremë para oficerëve të policisë gjyqësore”, “Prishja e qetësisë publike” dhe “Prodhimi, mbajtja, blerja apo shitja pa leje e armëve të ftohta”.
Policia e Korçës ka arrestuar në total 10 persona të përfshirë në përleshje, ndërsa një tjetër është shpallur në kërkim. Në pranga kanë përfunduar edhe: Petrika Ropi (28 vjeç), Ilir Shukulli (51 vjeç), Rafail Kocaqi (21 vjeç), Salvi Asllan (21 vjeç), Mihal Zhidro (31 vjeç), Serxhio Mema (25 vjeç), Gersi Dervishi (37 vjeç), Sotiraq Shkurti (31 vjeç) dhe Kristi Lamçe (29 vjeç), të gjithë banues në Korçë, të akuzuar për plagosje, shkatërrim prone, deklarim të rremë dhe prishje të qetësisë publike.
Ndërkohë, në kërkim është shpallur E. K., 38 vjeç, gjithashtu banues në Korçë.
Nga sherri mbetën të plagosur Zhidro dhe Shkurti, të cilët ndodhen në spital jashtë rrezikut për jetën.
Policia ka proceduar penalisht edhe pronarin e lokalit, R. I., 45 vjeç, pasi u konstatua se kishte punonjës të paregjistruar.
Dyshohet se konflikti nisi për motive banale dhe më pas degradoi në përleshje me thika, sende të forta dhe karrige, duke shkaktuar dëme materiale në lokal.
EMRAT/ Kush janë 10 të arrestuarit për sherrin me thika në Korçë, në hetim dhe pronari i lokalit
