Platformat qeveritare digjitale, e-Albania, paraditen e kësaj të hëne, për një kohë të gjatë ishte jashtë funksionit, duke u kthyer në një pengesë për qytetarët që kërkojnë të marrin shërbime përmes platformës në fjalë.
Siç shihet edhe në foton e mëposhtme, faqja online e “E-Albania” nuk hapej fare dhe qytetarët e kanë patur të pamundur për të shkarkuar certifikata, të aplikojnë për dokumente identiteti apo të nxjerrin ekstrakte për banka, noterë apo gjykata, por janë detyruar të braktisin procesin plotësisht dhe të rrinë në pritje.
Kjo është një situatë e përsëritur, ku platforma “e-Albania”, e planifikuar si themeli i digjitalizimit të shërbimeve publike, është praktikisht e papërdorshme nga celularët, ku ndonjëherë aksesohet vetëm në kompjuter, duke krijuar një përjashtim masiv për mijëra qytetarë që nuk disponojnë pajisje desktop.
Ironia është se për mirëmbajtjen e këtij portali digjital, qeveria ka hedhur miliarda lekë ndër vite, të menaxhuara nga Mirlinda Karçanaj, drejtoresha e AKSHI-t, institucioni që teorikisht garanton funksionimin e platformave shtetërore online.
Opozita, por edhe ish-numri dy i Qeverisë, Arben Ahmetaj, kanë akuzuar se miliardat e lekëve që tenderohen nga AKSHI, shkojnë tek familjarët e kryeministrit, Edi Rama.
“AKSHI është kopshti privat i kryeministrit, ku njerëz të lidhur me familjen e tij bëjnë çfarë t’i dojë qejfi. Në korrupsionin e AKSHIT është e përfshirë drejtpërdrejt familja e kryeministrit.” – ka deklaruar Ahmetaj në një intervistë televizive.
Tenderat abuzivë të AKSHI-t po hetohen edhe nga Prokuroria e Posaçme (SPAK), por deri më tani nuk është marrë asnjë veprim konkret, përveç dëshmisë së drejtoreshës, Mirlinda Karçanaj, e cila menjëherë pasi doli nga SPAK, shkoi në zyrë dhe firmosi shkakrkimin nga detyra të zv.drejtorit të AKSHI-it, Daniel Shima, i cili ishte marrë në pyetje më parë.
Rreth dy javë më parë, Daniel Shima u zhduk për rreth 10 orë, ku u pretendua se ai ishte rrëmbyer dhe torturuar, që të mos flasë.
