Këshilli i Lartë i Prokurorisë (KLP-së) ka liruar nga detyra drejtoreshën e Byrosë Kombëtare të Hetimit (BKH), Aida Hajnaj. Drejtoresha e BKH-së është liruar nga detyra për shkak të përfundimit të mandatit.
Mësohet se 6 anëtarë të KLP-së kanë votuar pro, duke pretenduar se mandati i saj ka përfunduar më 31 gusht, ndërsa 4 të tjerë kanë votuar kundër, duke mbajtur qëndrimin se ajo duhet të vijonte të rrinte në detyrë deri në emërimin e drejtuesit të ri të BKH-së.
Më konkretisht mësohet se Erind Mërkuri, Sokol Stojani, Olger Eminaj dhe Erind Gërmenji votuan se Aida Hajna duhet të vijojë të jetë në detyrë edhe për ditët në vijim. Ndërkohë, Erjon Fejzulla, Arta Mandro, Zeqir Hoda, Ledina Rizaj, Mirela Bogdani dhe Vate Staka votuan se mandati i Hajnajt ka përfunduar më 31 gusht.
Aida Hajnajt i përfundoi mandati 5-vjeçar në krye të BKH-së më 31 Gusht. Edhe pse kishte shprehur që më 28 mars interesin për një tjetër mandat, ajo u përjashtuar nga e drejta për rikandidim, pasi nuk dorëzoi dokumentacionin e kërkuar brenda afatit të caktuar nga Komisioni i Përzgjedhjes deri më 7 maj.
Më pas SPAK-u hapi garën për përzgjedhjen e drejtuesit të ri dhe shtatë kandidatët e mbetur në garë janë Gledis Nano, Andi Pogaçe, Artur Beu, Elton Kërluku, Gentian Ndoi, Gentjan Shehaj dhe Joni Keta.
Mediat kanë raportuar për një garë të paracaktuar, pasi dy kandidatët favoritë për të marrë postin e drejtuesit të BKH-së janë Joni Keta dhe Elton Kërluku, e cila ka sjellë edhe një përplasje mes Altin Dumanit dhe Arben Krajës.
