Banorët e fshatit Dritas–Tapizë po përballen me një situatë kritike, pasi prej tre ditësh ndodhen pa energji elektrike.
Ata thonë se defekti nisi pas erës së fortë që përfshiu zonën, por deri tani nuk është dhënë asnjë përgjigje konkrete se kur pritet rikthimi i energjisë.
Sipas tyre, punonjësit e OSHEE janë shfaqur disa herë në zonë, por largohen pa e rregulluar problemin, duke i lënë banorët në terr dhe të pamundur të përballojnë nevojat bazë të përditshme.
“Ka tre ditë që jemi pa drita. OSHE vjen dhe ikën, por defekti mbetet po aty. Nuk dimë asgjë, ndërkohë që fëmijët, të moshuarit dhe bizneset e vogla po vuajnë pasojat”, shprehen banorët.
Ata kërkojnë ndërhyrje urgjente nga autoritetet për zgjidhjen e situatës, e cila po bëhet gjithnjë e më e padurueshme, sidomos në këtë periudhë të verës ku temperaturat e larta dhe mungesa e energjisë sjellin pasoja të shumta.
