“Dragoi dhe Elefanti mund të kërcejnë sëbashku” – Kështu mund të përmblidhet simbolikisht takimi mes Xi Jinping dhe Narendra Modi në Samitin e SCO (Organizata për Bashkëpunimin e Shanghai), një moment që duket se synon të nxjerrë “jashtë loje” Donald Trump.
Ky takim shënoi rifillimin e dialogut mes dy rivalëve të mëdhenj aziatikë, të bashkuar nga pakënaqësia ndaj tarifave amerikane.
Në Tianjin, qytetin e blinduar dhe e zbukuruar për këtë ngjarje, takimi bilateral Xi-Modi pas shtatë vitesh mund të përbëjë një pikë kthese për ambiciet e SCO, BRICS dhe aleancave kundër G7.
Të dy liderët u shprehën se mund të jenë partnerë, duke konfirmuar rikthimin e tregtisë transkufitare pas pesë vjetësh.
Pekini vuri theksin edhe te tokat e rralla, të domosdoshme për elektronikën dhe industrinë e mbrojtjes, një lëvizje që synon të nënvizojë autonominë strategjike të Indisë dhe distancimin e saj nga SHBA-të. Xi dhe Modi u angazhuan për zgjidhjen e çështjes historike të kufirit të kontestuar dhe për mbështetjen e një tregtie të drejtë dhe multilaterale, një kritikë e fshehtë ndaj tarifave amerikane mbi naftën ruse.
Putin forcon lidhjet me Kinën
Xi takoi edhe Presidentin turk Recep Tayyip Erdogan, me të cilin diskutoi situatën në Gaza dhe Siri. Ai mirëpriti mbi 20 liderë të tjerë, përfshirë Vladimir Putin, i cili kërkon të përdorë SCO-n si platformë legjitimiteti ndërkombëtar për të kundërshtuar izolimin nga Europa. Putin synon të realizojë projekte ekonomike kyçe, përfshirë gazsjellësin Power of Siberia 2, ndërsa shkëmbimet tregtare mes Rusisë dhe Kinës kanë shënuar një rënie pas rritjeve të viteve të fundit.
Në pritje të takimit të zgjeruar, Kremlini njoftoi një konfrontim të parë mes Putinit dhe Xi, ku presidenti rus e informoi liderin kinez mbi bisedimet me Trump, duke dërguar një mesazh të qartë Washington-it: Rusia dhe Kina nuk mund të ndahen.
Energji, valutë dhe zgjerim
Sot, 1 shtator, do të mbahet mbledhja e madhe e organizatës, ku do të diskutohet për tregtinë, energjinë, qeverisjen digjitale, promovimin e monedhave kombëtare si alternativë ndaj dollarit dhe zgjerimin e grupit. Xi Jinping sot ka deklaruar se mbështet anëtarësimin e Armenisë dhe Azerbajxhanit. Diskutimet për luftën në Ukrainë do të mbeten kryesisht të mbyllura për publikun.
Kina vazhdon të përsërisë se organizata SCO nuk është kundër G7, por qasja anti-perëndimore u duk qartë në fjalët e Vladimir Putin, i cili sërish akuzoi Europën se po shtrembëron “historinë e Luftës së Dytë Botërore për interesa politike”. Ndërkaq, presidenti iranian deklaroi se ndodhet në Tianjin për të sfiduar “totalitarizmin amerikan”.
Strategji apo vetëm spektakël?
Është njoftuar nënshkrimi i një strategjie 10-vjeçare e zhvillimit të grupit, me qëllim të rritjes së ndikimit të tij global.
Megjithatë, shumë analistë paralajmërojnë se simbolika mund të ketë rëndësi më të madhe se substanca, duke marrë parasysh mungesën e reagimit të Trump ndaj Iranit apo tensionet mes Indisë dhe Pakistanit.
Në këtë fazë, simbolika është e fortë, bëhet fjalë për një “bllok hipotetik” që përfaqëson 40% të popullsisë botërore, i cili po vepron pa SHBA-të.
Burimi: La Stampa
