Një tjetër natë terrori në kryeqytetin ukrainas. Sulmet masive të ushtrisë ruse ndaj Kievit kanë shkaktuar të paktën tetë viktima dhe dhjetëra të plagosur, sipas autoriteteve lokale.
Presidenti ukrainas Volodymyr Zelenskyy reagoi menjëherë, duke akuzuar Moskën se ka zgjedhur “raketat balistike në vend të tryezës së negociatave” dhe se “po zgjedh të vazhdojë vrasjet në vend që t’i japë fund luftës”.
“Ukraina pret një reagim të qartë nga bota, përfshirë vendosjen e sanksioneve të reja ndaj Rusisë,” theksoi Zelenskyy. Ai u bëri thirrje të veçanta Kinës dhe Hungarisë – dy shtete që kanë lidhje të ngushta me Moskën – që të mbajnë një qëndrim të qartë ndaj agresionit rus.
Sipas Ministrit të Brendshëm Ihor Klimenko, fillimisht u raportua për katër të vdekur, përfshirë dy fëmijë, por bilanci u përditësua më vonë në tetë viktima. Kryetari i bashkisë së Kievit, Vitali Klitschko, tha se 38 persona u plagosën, 30 prej të cilëve ndodhen në spital.
Right now in Kyiv, first responders are clearing the rubble of an ordinary residential building after a Russian strike. Another massive attack against our cities and communities. Killings again. Tragically, at least 8 people have already been confirmed dead. One of them is a… pic.twitter.com/aukkujC9ji
— Volodymyr Zelenskyy / Володимир Зеленський (@ZelenskyyUa) August 28, 2025
Komanda ushtarake e Kievit bëri me dije se Rusia përdori dronë dhe raketa të tipit balistik, kruz dhe hipersonik, duke goditur objektiva në mbi 20 zona të kryeqytetit.
Shumë ndërtesa banimi u dëmtuan rëndë, përfshirë një pallat pesëkatësh që u shemb duke i zënë banorët nën rrënoja. Një kopsht fëmijësh dhe dhjetëra automjete u shkatërruan, ndërsa një qendër tregtare në lagjen qendrore të Kievit u godit nga shpërthimet.
“Këtu është gjithçka që duhet të dini për shtetin terrorist dhe për ‘dëshirat’ e Putin për paqe,” komentoi në Telegram Andriy Yermak, shefi i stafit të presidentit ukrainas.
