Një qytetar ka denoncuar një ngjarje shqetësuese që ka ndodhur në Himarë, ku makina e tij me targa të huaja është marrë me karrotrec dhe dërguar në komisariat për shkak të një parkimi të parregullt. Edhe pse gjoba prej 1,500 lekësh (15 mijë lekë të vjetra) është vendosur në mënyrë të rregullt nga policia, problemi qëndron te mënyra e zbatimit të procedurës. Shërbimin e karrotrecit e ka paguar qytetari.
Polici nuk ka pranuar t’i dorëzojë dokumentet e makinës përpara se të paguhej gjoba, duke bllokuar lëvizjen e qytetarit dhe kthimin e makinës.
Sipas denoncimit, qytetari ndodhej me tre fëmijë të vegjël në gjumë brenda në makinë kur ndodhi ngjarja. Ai është detyruar të marrë taksi në orën 11:30 të natës për të gjetur një pikë ku të kryente pagesën e menjëhershme të gjobës. Vetëm pasi ka sjellë vërtetimin e pagesës në komisariat, i janë kthyer dokumentet dhe makina.
“Këta policat këtu janë të lidhur me karrotrecin. Marrin makina me targa të huaja nëpër parkingje në rrugë që nuk ka asnjë tabelë që tregon se makina nuk lejohet ose do e bllokojmë ose do e marrim me karrotrec. I çojnë te oborri i policisë në Green Coast Himarë dhe aty kërkojnë lek. 100 i dhashë karrotrecit dhe 15 mijë pagova gjobën e policisë. Më detyruan, me 3 fëmijë të vegjël që ishin në gjumë brenda makinës, që unë të vija në orën 11:30 të natës të paguaja gjobën në Western Union, ndërkohë që atë gjobë mund ta paguaja të nesërmen. Lekët e karrotrecit i mori shoferi i karrotrecit”, shkruan qytetari për JOQ.
