Gjykata e Korçës ka vendosur masën e sigurisë “arrest me burg” për 41-vjeçarin Aleks Qiqi, i akuzuar për plagosjen me thikë të një 27-vjeçari në fshatin Dvoran. Vendimi u dha sot, gjatë një seance gjyqësore të zhvilluar në ambientet e spitalit, ku ndodhet i shtruar i akuzuari.
Ngjarja pak ditë më parë, kur Qiqi dhe i riu i plagosur, A. Kodra, ishin ulur në të njëjtën tavolinë me disa persona të tjerë. Debati mes tyre nisi fillimisht me fjalë, por situata degjeneroi. Pas konfliktit verbal, 41-vjeçari është larguar drejt banesës, ka marrë një thikë dhe është rikthyer për të qëlluar disa herë Kodrën, duke e plagosur poshtë shpatullës.
Personat e tjerë që ndodheshin aty e goditën fizikisht autorin pas ngjarjes, duke i shkaktuar dëmtime, por jashtë rrezikut për jetën. Ndërkohë, 27-vjeçari ndodhet ende në reanimacion, nën kujdesin e mjekëve.
Aleks Qiqi rezulton me precedentë penalë. Ai ka qenë i dënuar më herët për drogë dhe falsifikime, ndërsa ka kryer dënime edhe në Greqi. Burime bëjnë me dije se ai kishte dalë prej pak kohësh nga burgu.
