Situata e zjarreve në Shqipëri vijon të jetë e rënduar. Vetëm në 24 orët e fundit janë regjistruar 57 vatra zjarri, nga të cilat 29 mbeten ende aktive, sipas të dhënave zyrtare.
Zjarret janë përhapur në disa qarqe të vendit, përfshirë Vlorën, Dibrën, Beratin, Tiranën, Elbasanin, Gjirokastrën dhe Korçën. Në shumë raste, zjarret kanë rrezikuar banesa dhe ferma, ndërsa shkatërrimi i sipërfaqeve pyjore dhe kullotave vijon.
Disa nga zonat më të prekura përfshijnë:
Vlorë – Vatra aktive në Syrin e Kaltër (Delvinë), Malin e Sopotit (Finiq), fshatrat Pecë, Sirikat dhe Kardhikaq. Zjarri ka përfshirë edhe pyje dhe shkurre në Kuç (Himarë) dhe Brataj (Selenicë).
Dibër – Në Martanesh dhe Tërnovë (Bulqizë) janë përfshirë zona pyjore. Në Tërnovë, zjarret janë zhvilluar me intensitet për shkak të erës.
Berat – Zjarre në Zhapokikë, Plashnik dhe Rehovë (Poliçan), ku u evakuuan përkohësisht disa banorë për shkak të rrezikut ndaj banesave. Aktivitet zjarri edhe në Skrapar dhe Velçan.
Tiranë – Zjarre në Malin e Bërzhitës, fshatrat Ferraj, Zall-Herr, Spanesh dhe Kazie (Rrogozhinë). Terreni i vështirë ka penguar ndërhyrjen efektive në disa zona.
Gjirokastër – Zjarri i ardhur nga Finiqi është përhapur në Dropull, Lugar, Frashtan dhe majën e Leftokaresë. Zjarr aktiv edhe në zonën e Majës së Golikut (Tepelenë) dhe në Malin e Sopotit.
Elbasan – Zjarre në Gramsh, në fshatrat Kullollas, Kodovjat, Mukaj dhe Sojnik. Edhe pse disa vatra janë izoluar, të tjera vijojnë të përhapen.
Shkodër – Në Fushë-Arrëz, në fshatin Xath, zjarri ka rrezikuar edhe zonat e banuara në afërsi të majës Kunor Dardhës.
Kukës – Zjarr në Parkun Natyror Korab-Koritnik (Zapod), në një sipërfaqe të madhe pyjore.
Korçë – Në Kolonjë (Gërmenj) vijon zjarri në një zonë me pisha, ku janë raportuar edhe shpërthime të municioneve të mbetura në terren.
