Teksa Shqipëria po përballet me një situatë të rënduar prej zjarreve, ku terreni i thyer, mungesa e mjeteve nga ajri apo armotizimi i zjarrfikësve, ka bërë që bilanci të jetë tragjik, kryeministri Edi Rama ka gjetur kartën e ‘pafajësisë’ së tij dhe qeverisë së drejton.
Rama në një postim në ‘X’ shkruan se edhe pse fqinjët tanë kanë mjete ajrore për fikjen e zjarreve, përsëri po përcëllohen nga flakët.
Më tej Rama shkruan edhe nëse Shqipëria do të kishte mjetet ajrore për shuarjen e zjarreve, sërish do të kishte zjarre, pasi sipas tij edhe shtetet që po i vuajnë zjarret.
Postimi i plotë:
Ka shpërthyer një debat pse nuk blen Shqipëria avionë zjarrfikës, ndërkohë që ka ca llogari që duhen bërë dhe zjarret e ditëve të fundit nuk janë assesi çështje e një apo dy apo edhe tre avionësh! Dakord, mirë do ishte t’i kishim, por…
Duke i siguruar të gjithë se kemi këto ditë mjete nga ajri më shumë se çdo vit më parë, falë flotës sonë dhe mbështetjes nga Mekanizmi Europian apo Emiratet e Bashkuara Arabe, i ftoj të gjithë të ngrenë një pyetje: Po fqinjët tanë, Greqia dhe Italia apo Turqia dhe Spanja, që po përcëllohen më keq se ç’do vit tjetër kanë vallë mungesë avionësh?!
Ja një informacion bazuar në referencat e vetë shtypit grek për Greqinë për shembull:
Greqia ka një flotë ajrore totale prej 77 avionësh zjarrfikës; helikopterë janë pakashumë 20; automjete të tjera afërsisht 3,500 dhe zjarrfikëse të të gjitha llojeve e funksioneve.
Pra, e thënë thjeshtë. Sa më shumë aq më mirë padiskutim, por prapëseprapë kurimi i pasojave nuk i eliminon shkaqet, të cilat janë disa, janë njësoj për të gjithë shtetet që po i vuajnë zjarret këtë sezon (disa shumë më keq se ne meqë ra fjala) dhe janë shumë më komplekse se sa duken kur numëron avionët.
