Tirana dhe zona të tjera po përballen me temperatura ekstreme që kanë arritur deri në 43 gradë Celsius në hije, duke sjellë paralajmërime serioze nga mjekët për efektet në shëndetin e njerëzve.
Kardiologia Engjellushe Hasani shpjegon se temperaturat e larta ndikojnë veçanërisht tek personat me insuficiencë kardiake, ankth, diabet dhe sëmundje të tjera kronike. “Në këto kushte, zemra punon dy deri katër herë më shumë për të ruajtur balancën termike në trup,” thekson ajo.
Mjekët rekomandojnë uljen e aktivitetit fizik gjatë orëve të nxehta të ditës dhe konsumimin e ujit në sasi të madhe, deri në dy litra në ditë, madje edhe kur nuk ndjehet etje.
Për ata që nuk kanë akses në kondicioner, Hasani sugjeron përdorimin e akullit në zona si qafa dhe kofshët për freskim. Gjithashtu këshillohet konsumimi i ushqimeve të freskëta dhe jo shumë kalorike për të mbajtur trupin në gjendje të mirë gjatë vapës së fortë./ Top Channel
