Rikthimi i temperaturave të larta, ka rikthyer edhe zjarret në vend, ku Shqipëria po djigjet nga veriu në jug, përfshirë edhe Tiranë, me dhjetëra vatra zjarri, teksa nuk po digjen vetëm pyje dhe kullota, por në rrezik janë vënë parqet kombëtare, banesat dhe fshatra të tërë.
Sipas një raporti të dhënë nga Emergjencat Civile paraditen e sotme, në vend ishin 14 vatra zjarri aktive, por duket se këto janë shtuar edhe më shumë me kalimin e orëve.
Situata më problematike duket se paraqitet në zjarrin që shpërtheu disa ditë më parë pranë Uzinës së Armëve në Poliçan dhe vijon të jetë ende aktive, teksa flakët kanë marrë përmasa të frikshme.
Përveçse vazhdon në zonën malore, u raportua se zjarri ka kaluar mbi ujësjellësin, pranë një grupi banesash dhe pranë qytetit tek Azili i të Moshuarve.
Ndërkohë, Erion Braçe, gjatë pasdites publikoi një video dhe deklaroi zjarri ka dalë nga qyteti e po ngjitet në Kapinovë, po i afrohet Mbrakullës dhe rrezikohet i gjithë ky fshat, më i madhi i bashkisë, të digjet. Ai thotë se rrezikohen të digjen fshatrat me radhë, teksa u bën thirrje autoriteteve përkatëse të ndërhyjnë nga ajri për shuarjen e flakëve, si të vetmen mënyrë për t’i shpëtuar.
Zjarri në Poliçan po rrezikon të përhapet edhe në Parkun Kombëtar në Malin e Tomorrit.
Situata e rëndë vijon të jetë edhe në Finiq, ku për ditë me radhë zjarri kalon nga njëri fshat në tjetrin. Në fshatin Leshnicë e Poshtme të Finiqit u dogjën disa banesa. Sipas raportimeve, zjarri aktualisht ka kaluar në fshatin Krane, të njësisë administrative Mesopotam.
Ndërkohë, situatë problematike vijon të jetë edhe me vatrën e zjarrit që ka mbërritur tek Syri i Kaltër në Sarandë. Mësohet se aktualisht po digjet masivi pyjor, teksa flakët iu afruan edhe parkingut të zonës turistike. Po ashtu u dogjën dhe rreth 40 koshere bletësh, teksa rrezikohen me qindra të tjera.
Autoritetet evakuuan turistët nga parku kombëtar i Syrit të Kaltër, teksa qarkullimi Muzinë-Sarandë është mbyllur pasi flakët gjigande kanë zbritur deri në rrugë.
Situatë emergjente paraqitet edhe në pyjet e Gramshit, ku terreni i thepisur vështirëson vënien nën kontroll të flakëve. Zjarri ka përfshirë një sipërfaqe të konsiderueshme pyjore në Mukaj të Sojnikut, Njësia Administrative Kukur ndërsa gjatë pasdites shpërtheu një vatër e re zjarri më e madhe dhe më agresive mbi fshatin Sojnik.
Zjarrit nuk i ka shpëtuar as Tirana, ku një vatër shpërtheu në malin e Bërzhitës, në fshatin Ibë, ku flakët u përhapën me shpejtësi duke djegur një sipërfaqe me dhejtra hektarë.
Gjatë pasdites, një vatër zjarri ka përfshirë edhe fshatin Xath të Fushë-Arrëzit, ku flakët kanë hyrë në brendësi të fshatit dhe po përparojnë drejt banesave.
Po ashtu, zjarri ka rënë pasditen e kësaj të hëne edhe në fshatin Tërbaç të Vlorës, duke përfshirë një sipërfaqe të gjerë me pyje dhe kullota.
Zjarre po ashtu ka patur edhe në Mirditë, në Rrogozhinë, në Krujë, në Cërrik, në Tepelenë, në Klos etj, ku situata duket alarmante.
Por, në Shqipëri, zjarret nuk janë më fatkeqësi natyrore por janë krizë e përsëritur.
Shërbimet zjarrfikëse përballen me pajisje dhe një flotë automjetesh tejet të vjetruara, duke nxjerrë në pah një problem të gjerë të mungesës së investimeve në infrastrukturën e emergjencave civile.
Edhe pse buxhetet lokale janë të detyruara me ligj të parashikojnë fonde për shërbimet e emergjencës, investimi mbetet i pamjaftueshëm, duke lënë zjarrfikësit të luftojnë flakët me mjete rrethanore. Shpesh herë i kemi parë zjarrfikësit duke punuar me lopata, në kushte tejet të vështira për shuarjen e flakëve.
Po ashtu, edhe Qeveria nuk investon në blerjen e avionëve për shuarjen e zjarrëve. Dhe si çdo vit, trokasim tek shtet fqinje që na ndihmojnë me avionë për të bërë të mundur shuarjen e zjarreve, të cilët dalin jashtë kontrollit. E njëjta gjë ka ndodhur edhe këtë vit.
Fillimisht ishte Greqia dhe Italia që na ndihmuan me nga një helikopter për shuarjen e zjarreve, teksa sot, Ministria e Mbrojtjes raportoi se aktualisht po punojnë 3 helikopterë të forcës sonë ajrore, një i Çekisë, një tjetër i Sllovakisë, si dhe një Canadair nga Kroacia. Gjithashtu, në dispozicion janë edhe dy helikopterët Black Hawk të Forcës Ajrore të Emirateve të Bashkuara Arabe.
Pra, shteti për çdo vit mbahet me mjete hua për të përballuara zjarret, e teksa helikopterët kujtohemi t’i dërgojmë vetëm kur flakët marrin përmasa masive dhe djegin banesa e parqe kombëtare.
E teksa Shqipërisë po i digjen pyjet dhe parqet, e shqiptarëve banesat, duket se ministrat nuk e vrasin shumë mendjen për këtë gjë. Mirela Kumbaro e Turizmit dhe Belinda Balluku e Infrastrukturës mbrëmjen e djeshme po argëtoheshin në festivali “Nona” që po mbahej në Përmet.
Ndërsa, sot po të dyja bashkë, shkuan për të inspektuar punimet (për të bërë propagandë) në aksin rrugor Berat–Ballaban, që nuk dihet e sa herë të tjera do i inspektojnë deri në përfundimin e punimeve.
Ndërkohë, ministri i Mbrojtjes, Pirro Vengu duket se rri me telefon në dorë për të na raportuar në rrjetet sociale se kur çon ndonjë helikopter tek tuk, për të shuar zjarret, apo për të postuar për propagandë fotot e zjarrfikësve që po luftojnë me flakët, ku shpesh herë përsojnë edhe lëndime serioze.
Ndërkohë, Edi Rama vijon pushimet në vilën rezidenciale në Dhërmi, ku pret ndonjë “mik” të huaj për të negociuar dhënien e ndonjë pjese tjetër toke të Shqipërisë.
Ai del “live” me telefon, jo për të na raportuar se çfarë masash ka marrë për zjarrin, pasi dihet se në çfarë gjendjesh janë shërbimi zjarrfikës në Shqipëri, por se do i vendosë në mes të sezonit turistik 32 kg tritol një hoteli të ndërtuar pa leje në Vlorë, duke tmerruar turistët që në pikë të mëngjesit.
Edhe ky vit duket se do ikë, e fajet (pu)shteti do ja u hedhë sërish vetëm piromanëve, por ndërkohë shteti a ka përgjegjësi? Vitet kalojnë, çdo verë është e njëjta situatë dhe shteti mban sehir, pasi duket se nuk i intereson të investojë në helikopterë për shuarjen e flakëve, por qindra miliona euro i çon tek rrugët, aty ku paratë i marrin “klientat” e përhershëm të Qeverisë.
