Marrëveshja tregtare e Evropës me SHBA-në për tarifa prej 15% mbi një gamë të gjerë produktesh krijon ndikime të menaxhueshme për kompanitë, por nuk adreson pasiguritë specifike për grupet e biznesit të BE-së. Marrëveshja e Brukselit me Donald Trump lë shumë pikëpyetje për sektorë të veçantë, sidomos për industrinë e automobilave, farmaceutikën, minierat dhe kompanitë e mikroçipeve. Këta katër sektorë priten të jenë subjekt i masave të ndryshme, me ndikime përkatëse, sipas një raporti të ri të agjencisë së vlerësimit S&P Global Ratings.
Si rreziqe shtesë indirekte, por të rëndësishme, agjencia identifikon përkeqësimin e kushteve globale të tregtisë për shkak të tarifave, pasigurinë e përgjithshme të tregut, ndërprerjet e mundshme në zinxhirët e furnizimit, tensionet gjeopolitike dhe dobësimin e dollarit. Një euro më e fortë e bën eksportin e produkteve evropiane më pak konkurrues për vendet jashtë eurozonës dhe veçanërisht për SHBA-në, që së bashku me Kinën përbën tregun më të madh në botë. Këto pesë rreziqe pritet të ushtrojnë presion më të madh mbi grupet korporative evropiane sesa vetë tarifat.
Taksat prej 15% mbi eksportet e BE-së për në SHBA, të shpallura më 27 korrik, janë ndjeshëm më të ulëta se 30% që do të ishin aplikuar në mungesë të marrëveshjes tregtare para 1 gushtit. Edhe pse ky pakt është një shenjë e një marrëdhënieje tregtare transatlantike të menaxhueshme nëse Bashkimi Evropian tregon fleksibilitet ndaj kërkesave amerikane, ai nuk është ende i detyrueshëm ligjërisht dhe duket se ka interpretime të ndryshme për disa pika. Ndaj, agjencia nuk pret që një draft ligjor të jetë gati së shpejti.
“Tarifa 15% nuk është një kufi i garantuar për të gjithë sektorët e BE-së. Vazhdon të ketë pasiguri të konsiderueshme lidhur me trajtimin e disa industrive. Ratifikimi ligjor i marrëveshjes kërkon që ajo të publikohet në Regjistrin Federal të SHBA-së dhe të miratohet nga blloku. Kjo sjell pasiguri për kohën kur tarifa 15% do të hyjë në fuqi për sektorë të caktuar, si industria e makinave, që për momentin paguan ende një detyrim prej 27.5%. Po ashtu, masa 50% për eksportet e çelikut, aluminit dhe bakrit në SHBA mbetet ende në fuqi për momentin,” thuhet në raport.
Marrëveshja pritet të ndihmojë në reduktimin e pasigurisë për bizneset në BE dhe të zbusë disa nga rreziqet e mëdha që lidhen me politikat amerikane. Megjithatë, situata aktuale ka ulur besimin e ndërmarrjeve dhe parashikimet për të ardhurat dhe fitimet në shumë sektorë të BE-së. Në njoftimet e rezultateve për tremujorin e dytë, disa kompani kanë rishikuar në ulje pritshmëritë e tyre për vitin aktual, thuhet më tej në raport.
