Po zhvillohet mëngjesin e kësaj të enjte seanca për caktimin e masës së sigurisë ndaj katër personave të arrestuar nën akuzën e ndihmës në fshehjen e Flodian Plakut, i cili u kap pak ditë më parë në një hotel në Orikum, ndërsa ishte në kërkim për vrasje.
Të arrestuarit janë Albano Lapshi, i dyshuar se i siguronte ushqim Plakut gjatë qëndrimit të tij në fshehtësi; Armando Dano, berber nga Shkodra që besohet se e ndihmonte me ndryshimin e pamjes; Ligor Doko, pronar i hotelit ku fshihej Plaku; si dhe Julian Aliaj, i cili u kap i armatosur në momentin e arrestimit dhe ka precedentë penalë për trafik droge.
Prokuroria e Vlorës i akuzon të katërt për veprat penale “Përkrahja e autorit të krimit” dhe “Mbajtje pa leje e armëve dhe municioneve luftarake”, ndërsa në Gjykatë po pritet vendimi për masën e sigurisë.
Ndërkohë, Flodian Plaku u la në arrest me burg dy ditë më parë nga Gjykata e Tiranës. Ai akuzohet si një nga atentatorët e dyshuar për vrasjen e Gentian Bejtjas më 15 mars 2024 në banesën e këtij të fundit në Larushk të Fushë-Krujës.
