Plazhi i Bournemouth në Mbretërinë e Bashkuar është shpallur si plazhi më i ankuar në Europë, sipas një raporti të publikuar nga kompania teknologjike Cloudwards, i cili bazohet në analizën e më shumë se 1.3 milionë vlerësimeve në TripAdvisor për 200 prej plazheve më të vizituara në botë.
Çdo vit, miliona turistë drejtohen drejt destinacioneve më të njohura bregdetare të Europës me ëndrrën për një arratisje perfekte, por realiteti shpesh rezulton zhgënjyes. Ndër ankesat më të shpeshta renditen mbipopullimi, papastërtia dhe zhurma – me Europën që dominon listën globale për mbingarkesë.
Bournemouth, në majë të listës europiane të ankesave
Bournemouth, që ndodhet në jug të Anglisë, u rendit si plazhi më problematik në kontinent dhe i pesti në nivel global. Vizitorët ankohen për plazhin e mbushur tej mase, mungesën e pastërtisë dhe përvojën larg asaj që ofrohet në rrjetet sociale.
Në krye të listës globale për mbipopullim është La Pelosa në Sardenjë, Itali, ku thuajse 87% e vlerësimeve negative përmendin turmat si problemin kryesor. “Ishte mëngjes i një dite të zakonshme në shtator, por dukej si nata e ndërrimit të viteve në Londër apo Nju Jork,” shkruan një vizitor.
Pas La Pelosa vijnë Spiaggia La Cinta në lindje të Sardenjës, Praia da Falésia në Portugali, Cala Comte në Ibiza dhe Konnos Bay në Qipro – të gjitha të kritikuara për turmat, pavarësisht bukurive natyrore.
Greqia: më pak turma, por më shumë papastërti dhe zhurmë
Ndërsa Greqia nuk shquhet për mbingarkesë të lartë në raport, ajo dallohet për ndotje dhe zhurmë. Laguna Balos në Kretë u rendit e shtata në botë për papastërti dhe e 26-ta në përgjithësi, me gati gjysmën e ankesave që përmendin mbeturinat dhe 40% të tjera turmat.
Elafonissi, një tjetër plazh i njohur në Kretë për rërën rozë dhe ujërat e cekëta, u rendit si plazhi i shtatë më i ankuar në botë, ndërsa Porto Katsiki në Lefkada hyri në top dhjetëshen globale për zhurmën dhe trazirat, pavarësisht se u përfshi nga lista prestigjioze e 50 plazheve më të mira në botë për vitin 2025.
Kriza e turizmit masiv dhe masat për ta frenuar
Shumë nga destinacionet e përmendura në raport po përballen me presion të lartë turistik, ku fama virale tejkalon kapacitetet lokale. Kjo ka nxitur masa të reja rregullatore.
Sardenja ka vendosur kufizime ditore për vizitorët, rezervime të detyrueshme dhe ndalimin e peshqirëve për të mbrojtur rërën. Në Greqi, që nga viti 2025, është vendosur tarifë prej 20 euro për pasagjerët e kroçerave që zbresin në ishuj si Mikonos dhe Santorini. Ndërsa në Spanjë janë vendosur ndalime për pijet alkoolike dhe gjoba për sjellje të pahijshme në plazhe.
Në një Europë ku çdo copë rërë e artë është e lakmuar, ky raport tregon se plazhi i ëndrrave mund të kthehet lehtësisht në një makth turistik – një reflektim i qartë i disbalancës mes pritshmërive dhe realitetit në epokën e fotografive të filtruara.
