Nga Avokat Arben Llangozi
Administrata e korruptuar e Edi Ramës nuk njeh limite/Inspektorë të ISHSH-së “peshkojnë” në plazhet e jugut për ryshfet
Në kulmin e sezonit turistik, kur bizneset në bregdetin e jugut po përpiqen të përballojnë fluksin e pushuesve dhe barrën e taksave të larta, një tjetër problem i rëndë ka dalë në dritë, abuzimet e inspektorëve të institucioneve shtetërore.
Tre inspektorë të Inspektoriati Shëndetsor Shtetëror (ISHSH) Tiranë kanë zbarkuar në plazhet e Ksamilit dhe Sarandës. Sipas dëshmive të dhëna nga përfaqësues biznesesh, këta persona lëvizin nga një subjekt në tjetrin pa asnjë dokument zyrtar, pa urdhër pune dhe pa autorizim.
Në momente të ndryshme prezantohen si inspektorë të Autoritetit Kombëtar të Ushqimit (AKU), më pas si inspektorë të ISHSH-së, e deri si punonjës tatimesh.
Bizneset pretendojnë se këta inspektorë nuk hartojnë akte konstatimi, as nuk ndjekin procedurat ligjore të parashikuara për inspektimet, por thjesht ushtrojnë presion, duke lënë të nënkuptohet se kërkojnë pagesa nën dorë për të mos shkaktuar “probleme”.
Ky fenomen tregon se korrupsioni në administratën publike ka arritur nivele alarmante, ku punonjësit shtetërorë shndërrohen në “gjuetarë” të biznesit të vogël dhe turizmit. Bizneset ndihen të pambrojtura, pasi nga njëra anë i ndëshkojnë me gjoba të majme, ndërsa nga ana tjetër i shantazhojnë për ryshfet dhe në disa raste ata kanë marrë vlera të konsiderueshme parashë në formë korrupsioni.
Ky skandal ngre disa pyetje të forta për qeverinë.A e di Kryeministri Edi Rama se çfarë administrate ka ngritur?A është i informuar për mënyrën se si punonjësit e ISHSH-së përdorin pushtetin e tyre për të kërcënuar e shantazhuar bizneset?
Dhe mbi të gjitha, kush i mbron këta inspektorë dhe kush u jep mbështetje politike për të vepruar jashtë çdo ligji?
Në një kohë kur Shqipëria aspiron integrimin europian, pamjet dhe dëshmitë nga jugu i vendit tregojnë një realitet të hidhur: një shtet që nuk kontrollon administratën e tij, por e përdor atë si mjet presioni ndaj qytetarëve.
Kjo është “pasaporta europiane” e Edi Ramës: një administratë e degraduar ku inspektorë pa urdhër pune shantazhojnë bizneset dhe kërkojnë ryshfet.
