Fusha e mbetjeve në Vlorë është përfshirë sërish nga flakët, duke rikthyer një situatë alarmante për banorët dhe autoritetet lokale. Pamjet nga vendngjarja tregojnë re të dendura tymi dhe flakë që kanë mbuluar të gjithë zonën, e cila më parë është goditur disa herë nga zjarre të ngjashme.
Flakët kanë djegur edhe një nga eskavatorët që po punonte në terren, duke shkaktuar dëme materiale. Era e fortë ka favorizuar përhapjen e zjarrit, i cili tashmë është shtrirë në të gjithë hapësirën ajrore përreth dhe i është drejtuar zonave të banuara të qytetit.
Historia e zjarreve në këtë zonë nuk është e re, fusha e mbetjeve është përfshirë nga flakët tashmë në muajt mars, qershor dhe më herët gjatë sezonit të verës. Kjo e bën ngjarjen aktuale të theksojë problematikën e vazhdueshme të menaxhimit të mbetjeve dhe riskun e përsëritur për qytetarët.
Nga ana tjetër, kryebashkiaku Ermal Dredha, i cili mesa duket e sheh Vlorën nga rrjetet sociale në vend të terrenit, duket se “surprizohet” çdo herë që në si herën e parë. Tani pritet një deklaratë tipike, ku ai të shprehë “shqetësimin e thellë” dhe “vendosmërinë” për të marrë masa, po ato masa që mesa duket nuk kanë funksionuar që nga zjarri i kaluar.
