Vllaznia po përballet me një situatë delikate në repartin e sulmit, teksa merkatoja verore ka sjellë largime të rëndësishme dhe mungesë zëvendësimesh cilësorë.
Gjatë verës Vllaznia ka humbur dy sulmues të rëndësishëm: Ildi Gruda nuk rinovoi kontratën dhe vendosi të transferohet te Egnatia, ndërsa talenti Kevin Dodaj u shit për një shumë prej 400 mijë eurosh te CSKA e Sofies.
Largimet e tyre kanë lënë boshllëqe të theksuara në sulmin shkodran, çka u reflektua qartë edhe në ndeshjet ndaj Vikingurit në kuadër të Conference League.
Aktualisht, Bekim Balaj është i vetmi lojtar që përfaqëson një garanci në repartin ofensiv, ndërsa pjesa tjetër e alternativave nuk i përmbush pritshmëritë për titullarë. Çarls Bismark është kthyer te Skënderbeu, pasi huazimi i tij ishte i limituar vetëm për përballjet europiane.
Ndërkohë, Alfred Mensah konsiderohet më shumë si alternativë sesa si lider i sulmit, dhe emra të tjerë si Delaj, Ara apo Kubazi nuk janë sulmues tipikë për të udhëhequr vijën e parë.
Trajneri Edi Martini aplikon një sistem loje me dy sulmues, çka kërkon prani të dy profileve të fuqishëm në ofensivë. Mungesa e tyre është tashmë evidente dhe drejtuesit e klubit janë në kërkim të përforcimeve në merkato për të garantuar konkurrueshmëri dhe eficiencë para portës kundërshtare.
