Dy shtetase kineze dhe një shtetas shqiptar janë arrestuar në Durrës, ndërsa 7 persona të tjerë janë proceduar penalisht për prostitucion.
Ngjarja është regjistruar në lagjen nr. 13 të qytetit, ku shtetaset kineze D. Sh., 54 vjeçe dhe S. Y., 40 vjeçe, kishin marrë me qira dy apartamente, të cilat dyshohet se i kishin përshtatur për ushtrim prostitucioni.
Në pranga ka rënë edhe shtetasi S. M., 39 vjeç, banues në të njëjtën lagje, pasi akuzohet se u kishte dhënë apartamentet me qira pa kontratë dhe duke qenë në dijeni të qëllimit të përdorimit të tyre.
Po ashtu, janë proceduar penalisht në gjendje të lirë 2 shtetase të tjera kineze dhe 5 shtetas shqiptarë, të dyshuar për përfshirje në këtë veprimtari, nën akuzën për “Prostitucion”.
Gjatë kontrollit janë sekuestruar si prova materiale pasaporta, shuma parash, celularë dhe karta banke.
Sipas hetimeve të deritanishme, dyshohet se aktiviteti ishte i lidhur me kontakte jashtë vendit, pasi komunikimet kryheshin përmes një qendre telefonike (call center).
