Ademola Lookman vazhdon të bojkotojë stërvitjet e Atalantës, në shenjë proteste pasi klubi nuk pranon ofertat që i kanë mbërritur nga Interi. Sulmuesi nigerian kërkon me çdo kusht të transferohet te zikaltirt e për këtë arsye ka marrë vendimin ekstrem për të mos shkuar në stërvitje.
Mosparaqitja e tij për dy ditë radhazi në stërvitje me Atalantën, tashmë i jep të drejtë klubit të marrë masa disiplinore ndaj tij. Ato fillojnë me heqjen e rrogës ditore, te gjoba, për të vazhduar më pas me caktimin për t’u stërvitur veçmas ekipit, e deri te pezullimi i plotë i rrogës së tij pa e lejuar të largohet gjithsesi.
Por sipas mediave italiane, bergamaskët kanë vendosur që për momentin të mos marrin asnjë masë disiplinore ndaj futbollistit, edhe pse ai po përpiqet në të gjitha mënyrat të largohet nga radhët e tyre.
Klubi është në pritje të një oferte të përmirësuar të Interit dhe duket se nuk do t’i nënshtrohet trysnisë që po i bën Lukman për ta shtyrë të pranojë ofertën e fundit që i ka mbërritur për të.
