Analisti Enever Bytyçi, i ftuar në emisionin Balkan Talks, theksoi se Serbia punon fuqishëm për të forcuar rolin e saj në Ballkan, ndërsa u shpreh se Beogradi zyrtar sponsorizon dhe mbështet fuqishëm qeveritë e vendeve të rajonit që ato të mbajnë qëndrime radikale ndaj faktorit shqiptar.
Ai dha shembuj ku sipas tij këtë gjë e kanë bërë qeveritë në Maqedoninë e Veriut dhe Malin e Zi, ndërsa theksoi se këto sponsorizime të Beogradit vijnë në kuadër të asaj që Vuçiç kërkon, që Serbia së paku të ruajë influencën dhe ndikimin e saj në vendet e ish-Jugosllavisë.Sipas tij, shihet sesi në këto shtete vazhdohet të ketë qëndrime radikale ndaj shqiptarëve.
“Qëndrimet radikale të Gruevskit dikur, sot të Mickoskit dhe përgjithësisht të partisë së tyre, kur janë në pushtet, janë të diktuara nga politikat serbe dhe çdo qeveri në rajon që mban qëndrime radikale ndaj shqiptarëve duhet të dihet se ka autorizimin, sponsorizimin dhe mbështetjen e Beogradit. Qeveritë e Malit të Zi pro-serbe ishin qeveri të cilat sponsorizoheshin nga Beogradi. E gjithë loja politike e Serbisë është që të jetë lidership në Ballkan. Vuçiç kërkon të ruajë së paku influencën dhe ndikimin e tij në vendet e ish-Jugosllavisë dhe të krijojë një lloj partneriteti në dukje sovran me shqiptarët, duke artikuluar shpesh se në Ballkan janë dy popuj, serbët dhe shqiptarët, dhe mbi këtë balancë duhet të vendoset ekuilibri i marrëdhënieve në Ballkan. Duhet të dimë që prej vitit 1912 e deri më sot, kur Maqedonia e Veriut u bë pjesë e Serbisë, ka qenë krahinë, rajon ose pastaj republika me përkëdhelur e Serbisë, dhe politikanët maqedonas në periudhën e Jugosllavisë kanë qenë më agresivë se vetë serbët ndaj shqiptarëve. Në këtë sens është e arsyeshme të kuptojmë se lidhjet mes Shkupit dhe Beogradit janë shumë të qëndrueshme. Një rast konkret ka qenë në vitin 2012, kur ishte një mbledhje në Shkup nga Këshilli i Evropës dhe Kosova nuk u ftua,” tha analisti.
