Reshjet e dendura të shiut që kanë përfshirë rajonin juglindor të vendit gjatë orëve të fundit kanë shkaktuar probleme serioze në qarkullimin rrugor, veçanërisht në segmentin Gramsh–Korçë, ku një pjesë e rrugës është bërë përkohësisht e pakalueshme për automjetet për shkak të rrëshqitjeve të dherave dhe inerteve.
Ndër zonat më të goditura nga kjo situatë është fshati Bratilë, ku një rrëshqitje masive e dherave dhe rënia e gurëve në njërin krah të rrugës ka krijuar bllokim dhe rrezik real për drejtuesit e mjeteve.
Për rreth gjashtë orë me radhë, automjetet janë detyruar të lëvizin me shpejtësi minimale dhe në kushte tepër të vështira, duke rritur rrezikun për aksidente dhe dëmtime.
Fadroma apo ekskavatorë të shërbimeve rrugore nuk janë parë në terren. Autoritetet lokale nuk kanë dhënë ende një deklaratë zyrtare mbi masat që pritet të merren për rregullimin dhe normalizimin e qarkullimit.