Një çift nga shteti i Ohio në SHBA, ka sjellë në jetë një djalë nga një embrion i cili kishte qenë i ngrirë për më shumë se 30 vjet, një rast i rrallë që besohet të jetë rekord botëror për një lindje të suksesshme nga embrion i ruajtur për kaq gjatë.
Lindsey 35 vjeçe dhe Tim Pierce 34 vjeç mirëpritën më 26 korrik lindjen e djalit të tyre, Thaddeus Daniel Pierce, duke shënuar një moment historik për shkencën riprodhuese dhe për familjen e tyre, e cila për vite me radhë ishte përballur me vështirësi për të pasur fëmijë.
Në një intervistë për MIT Technology Review, Lindsey u shpreh se familja e saj e përjetoi këtë si “diçka që të kujton një film fantastiko-shkencor”.
Sipas të dhënave, embrioni ishte ngrirë për plot 31 vjet, duke thyer rekordin e mëparshëm, të mbajtur nga një çift binjakësh që lindën në vitin 2022 nga embrione të ngrira në vitin 1992.
Historia e embrionit fillon në vitin 1994, kur Linda Archarnd, atëherë 62 vjeçe, krijoi katër embrione nëpërmjet fertilizimit in vitro (IVF) me ish-bashkëshortin e saj. Nga ato katër embrione, njëri rezultoi në lindjen e vajzës së tyre, e cila sot është 30 vjeç, ndërsa tre të tjerët u vendosën në ruajtje kriogjenike.
Për më shumë se tre dekada, Archarnd pagoi mijëra dollarë në vit për të ruajtur embrionet. Ajo nuk pranoi t’i shkatërronte, t’i dorëzonte për kërkime shkencore apo t’i jepte në mënyrë anonime për adoptim, duke insistuar se donte të kishte dijeni se ku do të përfundonin.
“Për mua ishte e rëndësishme që fëmija të ishte i lidhur me vajzën time biologjike, të ishte një familjar real,” tha ajo për MIT Technology Review.
Pas shtatë vitesh përpjekjesh të pasuksesshme për të pasur fëmijë, çifti Pierce vendosi të kërkojë mundësi për të adoptuar një embrion. Falë një agjencie të specializuar në adoptimin e embrioneve, ata u lidhën me zonjën Archarnd, e cila kishte ruajtur embrionin për dekada.
Përkundër vjetërsisë së embrionit, klinika Rejoice Fertility në Tennessee, e cila kreu transferimin, sqaroi se prioriteti i tyre është të trajtojnë çdo embrion që marrin, pa marrë parasysh moshën apo gjendjen e tij.
“Ne nuk kërkonim të thyenim ndonjë rekord,” tha Lindsey. “Ne thjesht donim të kishim një fëmijë.”
Archarnd ka shprehur emocionet e saj për lindjen e Thaddeusit, edhe pse ende nuk e ka takuar personalisht. Ajo theksoi se ka vërejtur ngjashmëri fizike mes tij dhe vajzës së saj, duke e bërë edhe më të veçantë këtë lidhje biologjike që kapërcen kohën./BBC
