Juristi Ylli Manjani solli më emisionin “Now” në Euronews Albania disa përjetime të kohës kur në vendin tonë u votua unanimisht reforma në drejtësi 9 vjet më parë dhe ai ishte ministër i Drejtësisë.
Teksa e cilësoi votimin me 140 vota të kësaj reforme si papërgjegjshmërinë më të madhe të parlamentarizmit shqiptar, Manjani tregoi se drafti i kësaj reforme ishte mbajtur i fshehtë edhe ndaj tij që ishte ministër i Drejtësisë, ku tregoi dhe bisedat me ambasadorët.
“Të gjithë e kanë pasur frikë reformën në drejtësi, por më shumë kanë pasur frikë të mos e votojnë atë reformë. Vendimmarrja e asaj kohe dhe 140 votat e kam quajtur gjithmonë si më të papërgjegjshmen e parlamentarizmit shqiptar. Nuk jam kundër reformave por jo pa e papërtypur dhe jo reformë se e ka thënë dikush dhe hajde ta bëjmë. Më ka ndodhur mua ditën e parë të punës në zyrën e ministrit më thanë të dy Lu dhe Vlahutin; mos e lexo se e kemi parë ne, kërkova një draft, edhe ai ka qenë sekret, edhe për ministrin e Drejtësisë. Nuk duhej debat alternativ, këta e dinin që po të hyhej në debat, kishte alternativa shumë më të mira. Unë kam bërë një draft në atë kohë me Ilir Rusmalin dhe Krenar Lolocin, dy persona shumë të zotë në të drejtën kushtetuese. Drafti ynë ishte me shumë më pak nene dhe që nxiste më shumë konsensus dhe ruante gjuhën kushtetuese”, tha Manjani.
Sipas tij, votimi me 140 vota i reformës në drejtësi 9 vjet më parë u bë në një klimë të vërtetë shantazhi politik. Megjithatë, sipas Manjanit, në grupin e PD ka qenë një grup deputetësh të cilët ishin bërë gati ta votonin atë reformë duke i bashkuar votat me Ramën edhe nëse PD tërhiqej nga votimi.
“Besoj se ka qenë një grup, i bërë gati për ta votuar atë reformë në çdo skenar, edhe sikur PD të tërhiqej. Ka qenë një grup brenda PD që ishin dakordësuar me Ramën për ta votuar atë reformë me sy mbyllur. Majlinda Bregu ka qenë shumë e dhënë pas asaj reforme, Eduard Selami. Këta kanë qenë shumë për reformën, në çdo skenar, ishin edhe të përkëdhelurit e ambasadorëve, por që në këtë rast i shërbenin Ramës edhe pa konsensusin e PD. Kjo ka qenë edhe belaja e Bashës që u detyrua që të japë edhe ai konsensusin për të marrë flamurin e të qenët burrë i mirë. Rama thoshte disa herë në atë kohë ‘do kërceni nga belaja’, do kërcënoheni. Ka qenë një mjedis shantazhi totalisht i papranueshëm për një shtet demokratik dhe askush nuk guxoi të bënte oponencën e duhur”, tregoi Manjani.
Më tej, Manjani deklaroi se ish-ambasadori amerikan në Tiranë, Donald Lu, u kishte garantuar liderëve të politikës se nuk do të prekeshin.
Manjani thotë se ai bëri gati një nen në draftin e reformës që tregonte këtë gjë. Më pas Manjani thotë se vetë politikanët e kundërshtuan një nen të tillë për imazh politik, sipas tij.
“Cilësia e atyre ligjeve është shumë e dobët. Koha tregoi që Reforma në Drejtësi ishte një mjet për të fuqizuar Edi Ramën. Në qoftë se, cilido që është në qeveri dhe merr drejtësinë e ndryshuar, e merr si mjet këtë dhe e përdor. Politika është imazh dhe në fund të ditës Rama e ka pasur kartë këtë në fushatë.
Meta kishte ngarkesa me video, Berisha kishte ngarkesa nga e shkuara dhe Basha që kishte qenë i pandehur, prapë i ngarkuar ishte.
Ka qenë dhe diskutimi: preken apo nuk preken liderët? Dhe Donald Lu e ka prekur këtë gjë. Liderët aktualë nuk do preken, u bë dhe një nen i posaçëm që këta nuk do preken. Berisha ka dalë i pari, ka thënë “jo”, Basha pas tij dhe Rama më pas ka thënë: “S’keni frikë ju, e heqim.”-tha Manjani.
