Rreth 540 mijë euro në valuta të ndryshme dhe një armë sportive janë sekuestruar nga Policia, pas një hetimi të zhvilluar ndaj disa subjekteve të këmbimit valutor në Elbasan.
Nga verifikimet ka rezultuar se administratorët e këtyre subjekteve nuk deklaronin të ardhurat e përfituara nga veprimtaria ekonomike.
Operacioni i koduar “The Script” është zhvilluar në bashkëpunim me Prokurorinë e Elbasanit, gjatë të cilit janë ushtruar kontrolle në 8 pika “exchange”, ku janë konstatuar shkelje të rënda të legjislacionit financiar.
“Nga kontrollet rezultoi se administratorët e 8 subjekteve të tilla nuk deklaronin të ardhurat që përfitonin. Në përfundim të veprimeve për këto raste, u referuan materialet në Prokurori ku nisi procedimi penal për administratorët e 8 subjekteve, shtetasit: K. B., 65 vjeç, S. T., 56 vjeç, I. I., 64 vjeç, R. T., 59 vjeç, A. T., 66 vjeç, E. Z., 22 vjeç, N. B., 37 vjeç dhe Z. B., 40 vjeç, të gjithë banues në Elbasan”, njoftoi policia.
Gjatë kontrollit në subjektin e shtetasit A. T. është gjetur dhe sekuestruar një armë sportive pistoletë me fishekë manovër, ndërsa nga të gjitha subjektet janë sekuestruar shuma të konsiderueshme parash në lekë, euro, dollarë, franga zvicerane, paund britanik dhe lira turke.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Elbasan për veprime të mëtejshme.
