Pas tre muajsh rënieje, duket se depozitat e përfshira në paranë e gjerë, i janë rikthyer sërish rritjes. Sipas të dhënave të sapopublikuara nga Banka e Shqipërisë, vlera e depozitave të përfshira në paranë e gjerë pësoi një rritje të lehtë me 0.3% në krahasim me majin. Konkretisht, në fund të muajit të kaluar, totali i depozitave ishte gati 1.39 trilionë lekë.
Depozitat e përfshira në paranë e gjerë i referohen të gjithë parave që qytetarët dhe bizneset mbajnë në bankë, pra paratë në llogaritë bankare, në llogari kursimi, në depozita afatshkurtra ose afatgjata dhe të tjera.
Nëse i referohemi monedhës, depozitat në valutë kapin vlera më larta se ato në lekë. Pra, shumica e parave tona në bankë rezultojnë të jenë në monedhë të huaj. Megjithatë, në krahasim me majin, kursimet në monedhë të huaj kanë pësuar rënie. Zhvlerësimi i euros ka shtyrë shumë qytetarë që të largohen nga mbajtja e kursimeve në monedhën evropiane dhe të zgjedhin më tepër depozita në lekë. Gjithashtu, normat e interesit për depozitat në euro kanë qenë shumë të ulëta.
Depozitat në monedhën kombëtare llogariten në 655 miliardë lekë, 1.5% më shumë se në maj. Ndërkohë, depozitat në valutë kapin një shifër prej 733 miliardë lekësh, një vlerë kjo rreth 0.7% më e ulët se në muajin pararendës.
Ndërkohë, të dhënat më të fundit nga Banka e Shqipërisë tregojnë se depozitat e transferueshme, të cilat i referohen parave që ne mbajmë në llogaritë tona bankare, vijojnë të jenë në shuma më të larta, ndjekur më pas nga depozitat pa afat dhe llojet e tjera të depozitave.
Depozitat e transferueshme në lekë kanë arritur në 381 miliardë lekë në maj, ndërsa ato në valutë kanë zbritur në 360 miliardë lekë. Nga ana tjetër, depozitat pa afat dhe depozitat e tjera në lekë rezultojnë me një rritje të lehtë.
Ndërkohë, për sa i takon depozitave në valutë të përfshira në paranë e gjerë, shifrat flasin për një rritje të depozitave me likuiditet të lartë (depozitat pa afat) dhe rënie të llojeve të tjera të depozitave./SCAN
