Autoritetet policore në Zvicër kanë arrestuar një çift shqiptaro-italian,më konkretisht një shtetas shqiptar 51 vjeç, rezident në Gjermani, dhe një shtetase italiane 35 vjeçe, me banim në zonën e Lugano-s, të cilët dyshohen për përfshirje në trafikimin e kokainës.
Mediat e huaja raportojnë se çifti u ndaluan në banesën e tyre në Davesco-Soragno, ku gjatë kontrolleve policore u gjetën dhe sekuestruan rreth 1.4 kilogramë kokainë dhe rreth dhjetë gramë tableta ekstazi. Ata dyshohen për përfshirje në një rrjet të gjerë shpërndarjeje të lëndëve narkotike në rajonin e Sottocenerit. Pas marrjes në pyetje, të dy janë vënë në arrest.
Kjo ndërhyrje është pjesë e një hetimi të zgjeruar që po zhvillohet prej disa muajsh, dhe që deri më tani ka çuar në arrestimin e disa personave të tjerë. Më 22 shkurt, gjatë një aksioni të policisë në një vilë në Pregassona, u sekuestruan 2.8 kilogramë kokainë, mbi një kilogram kanabis dhe nënprodukte të tij, si dhe armë zjarri një pistoletë dhe tre pushkë. Në atë rast u arrestuan dy italianë, 47 dhe 46 vjeç, dhe një shtetase rumune 28-vjeçare.
Hetimet e mëtejshme çuan, në fillim të prillit, në arrestimin parandalues të dy italianëve të tjerë, të moshës 57 dhe 34 vjeç, si dhe të një shtetaseje zvicerane 38-vjeçare. Aktualisht, autoritetet janë duke shqyrtuar edhe rolin e disa personave të tjerë të përfshirë, por për ta nuk janë marrë masa kufizuese të lirisë.
Ndaj të dyshuarve rëndojnë disa akuza, përfshirë shkelje të rënduar të Ligjit Federal për Narkotikët, pastrim parash, shkelje të Ligjit për Armët si dhe shkelje të Ligjit Federal për të Huajt dhe Integrimin. Hetimet po drejtohen nga prokurori publik Simone Barca.
