Në mediat pranë qeverisë “rrodhi” sot një foto e kryeministrit Rama i cili i shoqëruar nga bashkëshortja e tij, dukej qartë se ishte duke udhëtuar në një avion të zakonshëm linje. Imazhi, i cili pretendohej se ishte kapur nga një bashkëudhëtare e atij fluturimi u shoqërua me tituj komentues: ‘Opozita insiston se kryeministri fluturon me charter, Rama fotografohet me familjen në ‘economy class’”.
Në fakt, fotoja në vetëvete ngjall disa dyshime. Duket sikur kryeministri që gjendet në ulëset e para të avionit është fiksuar në celularin e një pasagjereje që ndodhet tek dera e hyrjes. Mundësinë që fotografja anonime ta ketë fiksuar shefin e qeverisë janë dy. Ose kur ka qenë duke hyrë, pa nisur flutirimi, ose kur është çuar nga vendi, gjatë udhëtimit. Por nëse do ti besojmë variantit të parë, i bie që Rama dhe bashkëshortja të kenë vdekur për gjumë (sepse ne foto duken qartazi duke pushuar) dhe mezi të kenë pritur të mbyllin sytë sapo ka nisur fluturimi.
Në versionin e dytë i bie që fotografja amatore të jetë ngritur enkas, të jetë zhvendosur skiç për nga dera për të shkrepur celularin e pa vënë re dhe e lënë e pa shqetësuar nga badigardët që shoqërojnë çiftin kryeministror dhe gjenden gjithmonë pranë.
Pra, më shumë mundësi ka që fotoja të jetë ndonjë “mis en scene” e parapërgatitur, dërguar për “Jeta osh qef” nga ndonjë qytetar gjoja anonim.
Por problemi nuk qëndron këtu. Te ta marrim të mirqenë se Edi Ramës i paska rastisur një ditë që mos i hypë, ‘Airbus A319-100’, me emrin “Ismail”, dhuratë nga Erdogani, por të ketë marrë avion linje.
A e mbyll ajo polemikën e hapur që prej fundit të vitit 2022? A i fashit ajo akuzat e ish zv/kryeministrit Arben Ahmetaj që thoshte se një orë fluturim e shefit të qeverisë i kushton taksapaguesve jo më pak se 15 mijë euro? A e bën ajo të harrohet shifrën e mbi 22 milionë eurove të shpenzuara në ajër midis viteve 2013-2022?
Kur plasi polemika e udhtimeve të luksit, pasi dolën hakerimet e të dhënave të TIMS nga iranianët, të cilat tregonin edhe llojin e mjetit me të cilin kishte udhëtuar kryeministri, u faktua se ai kishte përdorur plot 137 herë avionin privat. Në vend që të jepte llogari dhe të bënte transparencë, Rama u fut në një spirale alibish që ranë njëra pas tjetrës. Fillimisht ai mohoi shifrat, pastaj tha se kishte një kontatë promoicionale, vijoji më tej duke thënë se ai shërbente si mascot për promovimin e Air Albanias. Fillimisht nga një sallë në Bulqizë, ku dhjetra militantë duartrokisnin çdo gjë që ai nxirrte nga goja, Rama nga i akuzuar e ktheu në sulm kundër Berishës: “Që ta dijë hiena që është non grata, se hiena kur bëhet non grata është llahtar fare, apo hienë spiun, më keq akoma. Pastaj janë edhe ca hiena të tjera që kuisin në ekrane e portale gjithë ditën e natën, i bëjnë llogaritë me çarterat që marrin vetë, por janë gjëra që sidoqoftë do të sqarohen të gjitha. Në fund triumfon e vërteta, por do hash dynjanë, se e ke rrugën mbushur me hiena”, tha atëhere ai.
Ai e vazhdoi për disa ditë këtë taktikë mbrojtëse duke shkruar edhe në rrjetet e veta sociale: “Si të mos ndjesh neveri për rublaxhinjtë e opozitës dhe gjobaxhinjtë e ekraneve, përhapës gënjeshtrash e shpifjesh, katranë me bojë që tallen me publikun!”.
Ai fillimisht tha se marrëveshja shërbente si model i promovimit dhe reklamimit të linjës ajrore me flamur shqiptar. Pastaj nxorri shifra qesharake për kostot e këtyre udhëtimeve (faksimilja poshte).
Natyrisht, kush ka dy pare mend nuk mund ta hajë se një udhëtim me avion personal kushton 600 mijë lekë të vjetra, askush nuk e besonte se ne paskemi një kryeministër super star që shërbeka si maskot i kompanisë ajrore dhe fluturon me avion taksi për t’i bërë promocion asaj.
Dhe që të gjitha këto rezultuan fake kur mediat arritën të sigurojnë kontratën e Drejtorisë së Shërbimeve qeveritare me Air Albanian. Aty nuk kishte asnjë nen reklamimi në këmbim të uljes së kostove.
Për të gjitha këto arsye 35 deputetë të opozitës kërkuan ne fillim te 2023-shit, ashtu sikurse ia kërkonte ligji, ngritjen e një komisioni hetmimor për shpenzimet e avionëve privatë të Edi Ramës. Por mazhoranca e rrefuzoi më kokfortësi atë duke provokuar edhe sherr e flakë në kuvend në mënyrë që mos bëhej për asnjë cast transparencë. Më në fund, ajo ndryshoi edhe ligjin për komisionet hetimore duke e varrosur të vërtetën e udhëtimeve të luksit të kryeministrit.
Prandaj fotoja e sotme, e cila sipas mediave pro qeveritare hedh poshtë propagandën e opozitës është një vrimë në ujë. Edhe nëse nuk është e inskenuar, ajo prap nuk ka asnjë vlerë pasi s’tregon asgjë më shumë se ndonjëherë edhe Ramës mund ti rastisë të udhëtojë si gjithë shqiptarët./ Lapsi.al
