Një kapitull i ri po hapet në marrëdhëniet e mbrojtjes gjermano-turke, pasi qeveria gjermane thuhet se është gati t’i japë fund vetos së saj të gjatë dhe të miratojë shitjen e avionëve Eurofighter në Ankara.
Sipas njoftimeve, Berlini ka vendosur t’i japë një përgjigje pozitive kërkesës paraprake të Airbus për Turqinë, duke hapur negociata zyrtare për dorëzimin e avionit.
Detajet teknike dhe pikat e negociatave për prokurimin e Eurofighter janë një temë kryesore diskutimi gjatë vizitës së Ministrit të Jashtëm gjerman Johann Vandeful në Ankara sot (17 tetor).
Në një intervistë me gazetën Hurriyet, Vandeful theksoi se është në interes të vendit të tij dhe të NATO-s që Turqia të marrë këta avionë luftarakë.
“Gjermania dhe Turqia përballen me sfida të mëdha në forcimin e aftësisë mbrojtëse të NATO-s në Evropë. Ne kemi vendosur që Turqia, si aleate, mund të forcojë fuqinë e saj parandaluese me ndihmën e Eurofighters. Kjo është në interesin tonë, pasi Turqia është një partner strategjik kyç për ne brenda Aleancës. Megjithatë, negociatat mbi detajet janë ende duke vazhduar”, tha ndër të tjera ministri gjerman.
Programi Eurofighter Typhoon është bashkëpunimi më i përparuar i aviacionit në Evropë dhe po zhvillohet bashkërisht nga Gjermania, Mbretëria e Bashkuar, Italia dhe Spanja. Shitja në një vend të tretë kërkon miratimin e të katër shteteve.
