Kreu i Partisë Demokratike, Sali Berisha gjatë fjalës së tij në konferencë për mediat ka folur në lidhje me zgjedhjet e 11 majit.
Berisha u shpreh se pas kryeministrit Edi Rama armiku kryesor i votës është kreu i SPAK, Altin Dumani.
Sipas Berishës Dumani e ka faktuar këtë pasi edhe pse ka marrë dhjetëra padi i ka mbyllur dhe nuk heton asnjë nga rastet. Ai shtoi se Dumani është mercenar i narkoshtetit. Berisha shtoi se çështja “Braçe” është dërguar te Prokuroria e Tiranës.
Berisha shton se çështja është dërguar në Prokurorinë e Tiranës sa për të larë duart me të. Ai tha se çështja ka ndodhur në një kohë kur është krim elektoral dhe Braçe është deputet.
“Altin Troplini pas Edi Ramës, është armik kryesor i votës së lirë të shqiptarëve. Dhe këtë ai e ka faktuar në mënyrën më kriminale. Ai ka marrë gjatë kësaj periudhe, me dhjetëra e dhjetëra padi, por ai mbyll dhe nuk hap asgjë. Është një mercenar i narkoshtetit. Njeri i zhveshur nga çdo lloj parimi.
Sot para se të vij këtu, marr në telefon Belind Këlliçin. Belind ku je? Në Prokurorinë e Tiranës. Po pse je aty? Jam aty tha se, këtu kanë sjellë çështjen ‘Braçe’. A ju kujtohet ju se cila është çështja ‘Braçe’? Zyra ilegale e PS-së, zona tek rruga e Kosovarëve, ku regjistroheshin dhe paguheshin dhe kryenin veprime ilegale, e pa arreduar me të gjitha simbolet. Pra ishte zyrë ilegale.
Shikoni çfarë bëjnë tani këta. Për të larë duart me të, shkon në prokurorinë e Tiranës, në një kohë kur është krim elektoral, në një kohë kur Braçe është deputet. Në qoftëse ka një armik të egër pas Edi Ramës, vota e lirë ka Altin Troplinin. Unë këtë e kam denoncuar dy vite më parë, që kur ai mbylli dosjen 184, 339″, tha Berisha.
