Partia “Shqipëria Bëhet” ka paraqitur ankesë në Komisionin e Ankesave dhe Sanksioneve (KAS), duke kundërshtuar vendimin e Komisionit Qendror të Zgjedhjeve për t’i dhënë mandatin e deputetit Kleana Xhuvelit.
Sipas kësaj force politike, KQZ ka vepruar në kundërshtim me dokumentacionin zyrtar të paraqitur prej tyre, në të cilin theksohej se disa kandidatë, përfshirë edhe Xhuvelin, kishin paraqitur dorëheqjen nga mandati.
“Shqipëria Bëhet” argumenton se, në përputhje me listën shumëemërore dhe mungesën e dorëheqjes, mandati duhej t’i kalonte kandidatit të radhës, Adriatik Lapaj, i cili, sipas tyre, gëzon mbështetje të gjerë nga qytetarët dhe nuk ka hequr dorë nga mandati.
“Në përfundim kërkojmë: 1. Ndryshimin e Vendimit Nr. dt. 23.07.2025, të Komisionit Qëndror të Zgjedhjeve “Për caktimin e kandidatëve fitues të subjektit zgjedhor Koalicioni “Nisma Shqipëria Bëhet” në zonën zgjedhore Qarku Tiranë, për zgjedhjet për Kuvend të datës 11 maj 2025.
2. Mosnjohjen si të vlefshme të revokimit të dorëheqjeve të depozituara përkatësisht në datë 15.07.2025 nga Zeqir Kordhoni dhe në dt. 17.07.2025 nga Kleana Xhuveli.
3. Shpalljen e kandidatit fitues nga lista shumë-emërore sipas numrit të votave parapëlqyese, të subjektit zgjedhor Koalicioni “Nisma Shqipëria Bëhet” për Qarkun Tiranë, si më poshtë: 1. Adriatik Ferman Lapaj SHB.
4. Miratimin e kandidatëve të mbetur, të cilët nuk kanë përfituar mandat në listën shumë-emërore të subjektit zgjedhore Koalicioni “Nisma Shqipëria Bëhet” në bazë të renditjes sipas numrit të votave parapëlqyese, duke filluar nga numri më i lartë i votave dhe duke zbatuar kriterin gjinor”, thuhet ndër të tjera në kërkesën që “Shqipëria Bëhet” i ka dërguar KAS.
Tashmë pritet që KAS të shqyrtojë çështjen dhe të dalë me një vendim përfundimtar, që do të përcaktojë përfundimisht emrin e deputetit të ri që do të marrë mandatin.
