Kreu i “Shqipëria Bëhet”, Adriatik Lapaj, ka reaguar ndaj ligjit për investimet strategjike dhe Paketën e Maleve, duke i cilësuar ato si dy mekanizma që, sipas tij, po përdoren për tjetërsimin e pasurive publike në favor të njerëzve pranë pushtetit.
Përmes një postimi në rrjetet sociale, Lapaj shprehet se prej kohësh ka debate dhe denoncime për prona që po rrëmbehen përmes këtyre ligjeve, ndërsa komunitete të tëra po përballen me padrejtësi dhe cenim të të drejtave të tyre.
“Paketa e Maleve dhe ligji ‘Për investimet strategjike’ janë dy mjetet juridike me të cilat po vidhet pasuria publike. Kaq shumë debat çdo ditë për pronat që po rrëmbehen përmes këtyre dy ligjeve; kaq shumë komunitete që po dhunohen; kaq shumë pasuri kombëtare që po i kalojnë me të padrejtë njerëzve afër pushtetit”, shkruan Lapaj.
Ai thekson se, sipas Kushtetutës, këto ligje mund të shfuqizohen nga qytetarët përmes referendumit kombëtar, ndërsa u bën thirrje të gjithë qytetarëve që janë kundër tyre t’i bashkohen nismës për mbledhjen e firmave.
“Këtë padrejtësi e ndal vetëm shfuqizimi i të dy ligjeve. Ftoj këdo është kundër këtyre dy ligjeve të na bashkohet në procesin historik të mbledhjes së firmave për ta dërguar vendin në referendum”, përfundon Lapaj.
