Kryetari i Komisionit të Prokurimit Publik (KPP), Jonaid Myzyri është paraqitur këtë të hënë në Gjykatën e Posaçme të Apelit, ku do mbahet seanca për shqyrtimin e ankimimit të tij.
Myzyri ka ankimuar në Apel vendimin e Shkallës së Parë që caktoi ndaj tij masat e siguris “pezullim nga detyra”, si dhe detyrimin e tij për tu paraqitur në policinë gjyqësore. Ai është marrë i pandehur nga SPAK për veprën penale “Shkelje e barazisë së pjesëmarrësve në tendera apo ankande publike”, e kryer në bashkëpunim.
Sipas Prokurorisë së Posaçme, Jonaid Myzyri dhe shtatë zyrtarë të tjerë kanë favorizuar gjatë një procedure prokurimi një bashkim operatorësh, që kanë depozituar dokumente të falsifikuara.
Objekti i këtij hetimi ka qenë procedura e prokurimit me emërtimin: “Mirëmbajtje rutinë me përformancë rruga Rrëshen (Ura e Fanit) – Shpal, Shpal – Q. Bene – Hadroj, Shpal – Ura e Repsit”, me fond limit 219.8 milionë lekë pa tvsh, e zhvilluar më datë 18 shtator të vitit 2020 nga ana e Autoriteti Rrugor Shqiptar, ARRSH.
Në njoftim thuhej se shqyrtimi i procedurës nga ana e ARRSH ka pasur paligjshmëri, të cilat Komisioni i Prokurimit Publik, nuk i ka marrë në konsideratë.
“Gjatë shqyrtimit të ankesës të procedurës së mësipërme, ky Komision, në kundërligjshmëri ka favorizuar bashkimin e operatorëve ekonomik; A.M., dhe D.-1., ku pas veprimeve hetimore ka rezultuar se kanë paraqitur dokumente të falsifikuara”, konstaton SPAK-u.
