Avokatët e Erion Veliajt, i janë drejtuar me një kërkesë zyrtare Drejtorisë së Përgjithshme të Burgjeve, duke kërkuar informacion dhe dokumentacion mbi trajtimin mjekësor dhe masat e sigurisë gjatë një vizite në spital më 17 korrik 2025.
Sipas tyre, kjo vizitë është realizuar pas disa refuzimeve të mëparshme dhe është shoqëruar me një prani të konsiderueshme forcash sigurie, rreth 30 efektivë të policisë dhe hetues të BKH-së. Më tej pretendojnë se disa prej tyre kanë qenë të pranishëm edhe në sallën e ekzaminimit, çka për ta përbën shkelje të protokolleve mjekësore dhe të të drejtave të të paraburgosurve.
Mbrojtja kërkon transparencë për procedurat e ndjekura, kohëzgjatjen e qëndrimit në institucionin shëndetësor, si dhe planin e masave të sigurisë gjatë shoqërimit.
Ironikisht, kjo kërkesë për “kujdes njerëzor dhe procedura korrekte” vjen një javë pas zhvillimit të vizitës dhe pikërisht në të njëjtën ditë kur SPAK shpalli të pandehur shtatë biznesmenë të tjerë të lidhur me dosjen “Veliaj-Xoxa”, duke përfshirë edhe emra të njohur si Shkëlqim Fusha dhe Gentian Sula.
Në qendër të kësaj çështjeje është një skemë e dyshuar korrupsioni dhe pastrimi parash, përmes së cilës Veliaj dhe bashkëshortja e tij Ajola Xoxa dyshohet se kanë përfituar rreth 1 milionë euro ryshfet nëpërmjet lejeve të ndërtimit dhe kompanive të kontrolluara në mënyrë direkte ose të tërthortë.
Nën hetim janë gjithashtu deputetja e PS-së Klotilda Bushka, e akuzuar për pengim të zbardhjes së të vërtetës, si dhe familjarë dhe vartës të Xoxës. Një ndër personat kyç në hetim është edhe një efektiv i burgjeve, Fatjon Baçi, telefoni i të cilit zbardhi biseda të kryera nga Veliaj gjatë transportit drejt Apelit – biseda ku dyshohet se kryebashkiaku ka shprehur dëshirën për të kandiduar si deputet për të shmangur ndjekjen penale.
Vetë Veliaj i ka mohuar të gjitha akuzat dhe i ka cilësuar hetimet si “një proces Kafkian”. Por ndërkohë që rrethohet gjithnjë e më shumë nga dosja me mbi 60 mijë faqe të SPAK, avokatët e tij duket se janë kujtuar të ankohen për atmosferën gjatë një vizite në spital, një javë pasi ajo ka ndodhur. Dhe pikërisht, kur rrethi ligjor po ngushtohet.
Socialistët sëmuren me radhë, Erion Veliaj dërgohet në spital
