Trajneri i Milanit, Massimiliano Allegri, foli në konferencë për shtyp, një ditë para ndeshjes miqësore ndaj Liverpool.
Tekniku kuqezi deklaroi se pret paraqitje më të mirë se ajo ndaj Arsenalit, ku pak ditë më parë u mposhtën 1-0.
I pyetur për merkaton e kundërshtarit, Allegri u shpreh se nuk ka zili, sepse Milani, sipas tij po punon mirë në këtë drejtim.
“Nesër përballemi me Liverpool-in që është kampion i Anglisë, ka fituar kampionate dhe Champions. Është një test i rëndësishëm dhe duhet të bëjmë një paraqitje më të mirë sesa ajo kundër Arsenalit. Kundër ‘Topçinjve’ zhvilluam një ndeshje të mirë nga ana mbrojtëse dhe patëm disa raste në sulm që nuk i shfrytëzuam, por për momentin është në rregull kështu. Ky turne është shumë i rëndësishëm për të njohur njëri-tjetrin dhe për të qenë të përgatitur në fillimin e Serisë A
300 milionë euro investime nga Liverpool? Nuk jam ziliqar, sepse klubi ynë po punon mirë në merkato. Estupiñán ka mbërritur dhe do të jetë i rëndësishëm për ne. Tani do të duhet të gjejmë elementë të tjerë të mirë dhe funksionalë për organikën tonë.
Kundër Arsenalit Leao më pëlqeu. Si ai, ashtu edhe pjesa tjetër e skuadrës. Bëmë një ndeshje të mirë në aspektin mbrojtës dhe mund të ishim më të rrezikshëm përpara portës, por krijuam diçka. Shpresojmë të bëhemi skuadër sa më shpejt të jetë e mundur. Djemtë kanë dëshirë për të punuar dhe kjo është një gjë shumë e rëndësishme. Së pari duhet të njohim njëri-tjetrin dhe pastaj të përmirësohemi dita-ditës në stërvitje.
Modric është një kampion dhe një lojtar i jashtëzakonshëm teknikisht. Për të gjithë do të jetë një shembull, si në fushë ashtu edhe jashtë saj”, deklaroi Allegri.
Ndeshja miqësore Liverpool-Milan, do të luhet të shtunën e 26 korrikut, duke nisur nga ora 13:30.
